سرچینو افغانستان انټرنشنل ته ویلي، چې طالبانو په کندهار، هلمند او ارزګان ولایتونو کې د تېر جمهوري نظام د پخوانیو نظامیانو نوملړونه چمتو کړي او له تېرو څو ورځو راهیسې د یادو فهرستونو لهمخې ټول پخواني نظامیان څاري او د ټیلیفون له لارې یې د استوګنې ځایونه تثبیتوي.
د ایران د خراسان رضوي د ګمرکونو چارواکي وایي، د روان کال په لومړیو دریو میاشتو کې له دې ولایته د ۳۷۵ میلیونه ډالرو په ارزښت صادرات شوي چې په ملي کچه یې شپږم مقام خپل کړی خو افغانستان ته صادرات د وزن له مخې زیات اما د ارزښت له مخې ۳۵ میلیونه ډالره کم شوي دي.
د جرمني فدرالي حکومت ویلي چې په جرمني کې د افغانستان ډیپلوماټیکې استازولۍ لا هم د هغو کسانو له خوا اداره کېږي چې د افغانستان اسلامي جمهوریت له خوا د ۲۰۲۱ کال د اګست له سیاسي بدلون مخکې برلین ته لېږل شوي او په جرمني کې یې رسمي اعتبار ترلاسه کړی و.
د طالبانو د بهرنیو چارو وزارت وايي، په هرات کې یې د سلطان حسین بایقرا د شخصیت، افکارو او فرهنګي میراث په اړه علمي کنفرانس جوړ کړی چې د افغانستان، ایران، ترکیې او ترکمنستان استازو پکې ګډون کړی. د یاد کنفرانس موخه د ګډو تمدني شخصیتونو معرفي او فرهنګي همکاریو پراخول ښودل شوي.
د افغانستان د کرېکټ نوموتي لوبغاړي راشد خان د نورستان ولایت په مرکز پارون کې د وروستیو خونړیو سېلابونو د قربانیانو له کورنیو سره خواخوږي ښودلې او له ملي او نړیوالو مرستندویه بنسټونو او بډایه هېوادوالو یې غوښتي چې د نورستان د سېلاب ځپلو لاسنیوی وکړي.
د اوبلن ګاز د بیو لوړېدو په اړه د راپورونو له خپرېدو او پراخو شکایتونو وروسته د طالبانو تر واک لاندې د افغانستان د تېلو او ګازو شرکت د کابل او یوشمېر ولایتونو لپاره د اوبلن ګاز نوې بیې اعلان کړې دي.
په خېبر پښتونخوا کې د ماشومانو د کار په اړه د کارګرو ماشومانو بنسټ (چایلډ لیبر) په تازه خپور شوي راپور کې راغلي، چې په ټول ایالت کې ۷۳۴زره او ۹۶۰ هلکان او نجونې په بېلابېلو اقتصادي او کاري برخو کې پر کار بوخت دي.
په کندهار د طالبانو رسنیز دفتر خبر ورکړی، چې ۱۳زره او ۸۷۰ کیلو ګرامه بېلابېل نشهيي توکي یې د یوه پلاوي په حضور کې سوځولي دي. په نیمروز کې بیا طالب مسولینو ویلي، شاوخوا ۸۰۰ کیلوګرامه انساني درمل یې نیولي چې له پاکستان نه افغانستان ته قاچاق کېدل.
د خېبر پښتونخوا د باجوړ ولسوالۍ په لوی خرکي سیمه کې ناپېژاندو کسانو تېره شپه د چاودېدونکو توکو پرمټ یو دولتي ښوونځی ویجاړ کړی دی. په خپرو شویو انځورونو کې ښکاري، چې د چاودنې له امله د ښوونځي ودانۍ ویجاړه شوې ده.
سلګونه لاریونوال د دوشنبې په ورځ د هند په پلازمېنه نوي ډیلي کې راټول شول او غوښتنه یې وکړه، چې د هند تر ولکې لاندې کشمیر ته دې بېرته د ایالت حیثیت ورکړل شي. لایونوالو غوښتنه وکړه، چې یادې سیمې ته دې د ایالت پخوانی قانوني حیثیت بېرته ورکړل شي.
د خیبر پښتونخوا په ډېره اسماعیل خان کې د ناامنۍ له امله ګرځبندیز اعلان شوی. د اعلان له مخې؛ د سېشنبې په ورځ (د چنګاښ له ۲۱مې) نېټې راهیسې پر یوشمېر مهمو لویو لارو هر ډول تګ راتګ بند دی. دغه بندیز د سهار له ۶ بجو څخه د ماښام تر ۶ بجو پورې اعلان شوی دی.
د طالبانو د پېښو پر وړاندې د مبارزې چمتووالي ادارې مرستیال ویاند تاج محمد همت وایي، په نورستان کې د سېلابونو له امله ۲۳ کسان مړه او ۸۰ نور ټپیان شوي دي. د هغه په وینا؛ تراوسه د ۱۵ کسانو جسدونه موندل شوي او تر ۱۰۰ ډېر کسان لاهم لادرکه دي، چې د ژغورنې او لټون عملیات لاهم روان دي.
د طالبانو عدلیې وزارت خبر ورکړی، چې د یادې ډلې د مرکزي زون غصب شویو ځمکو ته د رسېدنې ځانګړې محکمې د پکتیکا ولایت په یوسفخېلو ولسوالۍ کې څه باندې ۱۵زره جریبه ځمکه دولتي اعلان کړې ده.
له کندهار نه سرچینې وایي، د دوشنبې په ورځ کندهار ته یو لوړپوړي نړۍوال پلاوي د سفر په ترڅ کې غوښتي چې د طالبانو له مشر ملا هبتالله اخوندزاده سره هم وګوري؛ خو د هغه نږدې کړۍ د یادې لیدنې اجازه نهده ورکړې.
د افغانستان پخواني ولسمشر حامد کرزي په نورستان کې د سېلابونو له امله د مالي او ځاني زیانونو په اړه خواشینې ښودلې ده. نوموړي له ملي سوداګرو او مرستندویه بنسټونو غوښتي، چې په دغه سختو شرايطو کې له سېلاب ځپلو سره مرستې وکړي.
په کاپیسا کې د طالبانو د پېښو پر وړاندې د مبارزې چمتووالي رییس محمد صابر احمد ویلي، د تېرې شپې د سختو ورښتونو له امله راوتلو سېلابونو د دغه ولایت په الهسای او تګاب ولسوالیو کې ۵۰ جریبه کرنیزه ځمکه ویجاړه کړې او یوشمېر نور مالي زیانونه یې هم اړولي دي.
اکسیوس وېبپاڼې د دوشنبې په ماښام (د چنګاښ ۲۹مه) راپور ورکړی، پهداسې حال کې چې د امریکا ولسمشر ډونالډ ټرمپ له ایران سره د بشپړې جګړې پیلولو په اړه فکر کوي؛ منځګړي لاهم هڅه کوي چې د تهران او واشنګټن ترمنځ یو نوی اوربند رامنځته کړي.
د خیبر پښتونخوا د خېبر ولسوالۍ په لنډي کوتل سیمه کې د حمزه بابا په نوم لنډمهاله پنډغالی چې له پاکستان نه د اېستل کېدونکو افغان کډوالو د راټولولو او ثبت مرکز دی، هره ورځ د لسګونه افغان کورنیو کوربه وي. زیاتې کورنۍ تر باران لاندې په دغه وروستي تم ځای کې د تګ یو اوږد انتظار کوي.
د خېبر پښتونخوا د نوښار ولسوالۍ په بېلابېلو سیمو کې د مېشتو افغان کډوالو پرضد روان عملیات نور هم چټک شوي دي. د یادې ولسوالۍ ځایي چارواکو په وینا؛ د پبي، خیراباد، رسالپور او شیرین کوټې په ګډون په یوشمېر سیمو کې د عملیاتو پرمهال ۷۶ افغان کډوال نیول شوي دي.
د امریکا ولسمشر ډونالډ ټرمپ ویلي، چې د اسراییل لومړی وزیر بنیامین نتنیاهو به امریکا ته د سفر پرمهال ونه نیول شي. دغه څرګندونې وروسته له هغې شوې، چې د نیویارک ښاروال زهران ممداني ویلي و نیویارک ښار ته د نتنیاهو د سفر پرمهال د هغه د نیولو موضوع څېړي.
د طالبانو تر کنټرول لاندې د کډوالو ستونزو ته د رسېدنې عالي کمېسیون خبر ورکړی، یوازې پرون دوشنبه (د چنګاښ ۲۹مه) له پاکستان او ایران نه ۶۱۶ کورنۍ چې د غړو شمېر یې ۳زره او ۲۹۳ کسان کېږي؛ افغانستان ته ستنې شوې دي.