د طالبانو د بهرنیو چارو وزیر امیرخان متقي د یکشنبې په ورځ (د وري ۱۶مه) د «افغانستان او منځنۍ اسیا د مشورتي خبرو اترو» غونډه کې د وینا پرمهال ویلي، د داعش ګواښونه، د نشهیي توکو قاچاق او ناقانونه کډوالي د افغانستان او منځنۍ اسیا ګډې اندېښنې دي.
د طالبانو د صنعت او سوداګرۍ وزیر نورالدین عزیزي د ازبکستان د درملو او صنایعو د پراختیا له مشر عبدالله عزیزوف سره د سوداګریزو او اقتصادي همکاریو پراختیا په موخه لیدلي دي. دغه وزارت وایي، چې ازبکستان غواړي د طالبانو د خوړو او درملو ادارې سره په ګډه یوه کاري ډله جوړه کړي.
د طالبانو سترې محکمې خبر ورکړی، چې په کابل کې یې ۱۵ کسان د نشهیي توکو (شیشې، چرسو او ټابلېټ کا) د پلور او قاچاق په تور په عام محضر کې په دُرو وهلي دي. د یادې محکمې په وینا؛ دغه کسانو ته له اوو میاشتو تر درېیو کلونو د تنفیذي بند او له ۱۰ تر ۳۰ دُرو سزا ورکړل شوې ده.
د امریکا، اسراییل او ایران په جګړه کې د پاکستان حکومت د امریکا او ایران ترمنځ د منځګړیتوب غږ داسې مهال اوچت کړی، چې په جګړه کې درېیم فریق (اسراییل) هم په مستیقمه توګه ښکېل دی.
د طالبانو د ټولګټو چارو وزارت ویاند محمداشرف حقشناس وایي، چې د کابل-جلالاباد لویه لار د «تنګي غارو» په سیمه کې له غره څخه د پرلهپسې ډبرو راښویېدو له امله لا هم د تګراتګ لپاره تړلې ده.
د طالبانو عدلیې وزارت د یادې ډلې د مشر ملاهبت الله تازه فرمان خپور کړی چې پهکې راغلي، په اداري مراسلاتو کې د بهرنیو ژبو د اصطلاحاتو پر کارونې بندیز لګېدلی. د یاد وزارت په وینا؛ دغه فرمان په څلورو مادو کې صادر شوی او د صدور له نېټې وروسته د اجرا وړ ګڼل شوی دی.
د طالبانو د بهرنیو چارو وزارت مرستیال ویاند حافظ ضیا احمد تکل وایي، د «افغانستان او منځنۍ اسیا مشورتي» غونډه د دې وزارت په نوښت نن (یکشنبه د وري ۱۶مه) په کابل کې پیل شوه. د نوموړي په وینا؛ د یادې غونډې مشري د طالبانو د بهرنیو چارو وزیر امیرخان متقي کوي.
د اسراییل پوځ د یکشنبې په سهار اعلان کړی، چې د دغه هېواد هوايي ځواک په تېرو ۲۴ ساعتونو کې د ایران حکومت اړوند د توغندیزو سیسټمونو او هوايي دفاعي شبکو پورې تړلي تر ۱۲۰ زیات هدفونه په نښه کړي دي.
په ننګرهار کې د طالبانو د والي ویاند احسانالله عثماني وایي، چې په دغه ولایت کې د وروستیو ورښتونو له امله ۱۵ کسان مړه او ۳۱ نور ټپيان شوي دي. دغه ورښتونو او سېلابونو د درنو ځاني تلفاتو ترڅنګ عامو خلکو ته پراخ مالي زیانونه هم اړولي دي.
د ملګرو ملتونو استوګنې ادارې (UN-Habitat) ویلي، په تېر ۲۰۲۵کال کې د افغانستان په ۲۸ ولایتونو کې تر ۳۱زره ډېر خلک د سېلابونو له امله اغېزمن شوي چې د پیاوړو زېربناوو بېړنۍ اړتیا په ګوته کوي.
د طالبانو ویاند مرستیال د یکشنبې په ورځ (د وري ۱۶مه) ویلي، چې د روان ۲۰۲۶کال د فبرورۍ له ۲۲مې د اپرېل تر ۴مې پورې پر افغانستان د پاکستان په وروستیو بریدونو کې ۷۶۱ ملکي وګړي وژل شوي او ۶۲۶ نور بیا ټپیان شوي دي.
په پکتیا کې د طالبانو رسنیز دفتر خبر ورکړی، چې د وروستیو پرلهپسې ورښتونو له امله راوتلو سېلابونو د دغه ولایت په مرکز ګردیز ښار او بېلابېلو ولسوالیو کې کڼ مالي او ځاني زیانونه اړولي دي. د دوی په وینا؛ په یادو پېښو کې دوه کسه مړه او ۱۱ نور ټپیان شوي دي.
په نورستان کې د طالبانو د ټولګټو چارو رییس مولوي احمدنبي عادل خبر ورکړی، چې د کونړ-نورستان لویه لاره د غره ښویېدنې له امله د تګراتګ لپاره تړل شوې ده. د هغه په وینا؛ دغه لار د مرکز پارون او واما ولسوالۍ اړوند چتراس، سټاب کټه بند او بونې سیمو کې د غر ښوېیدنې له امله تړل شوې.
په بلخ کې د طالبانو له نشهيي توکو سره د مبارزې عمومي مدیریت وایي، په تېر یوه کال کې یې د مزارشریف ښار په ګډون د دغه ولایت په بېلابېلو سیمو کې د نشهيي توکو د قاچاق او پلور په تړاو ۵۰۳ کسان نیولي دي.
په میدان وردګ کې د طالبانو امنیې قوماندانۍ خبر ورکړی، چې د کابل- کندهار پر لویه لاره د میدان وردګ ولایت د سیداباد ولسوالۍ د شنیز درې په مشنګکلا سیمه کې د یوې ټرافیکي پېښې له امله یو کس مړ او پنځه نور ټپیان شوي دي.
د طالبانو تر واک لاندې د کډوالو ستونزو ته د رسېدنې عالي کمېسیون خبر ورکړی، تېره ورځ (د وري ۱۵مه) ۲۸۴ کډوالې کورنۍ چې ټولټال ۱۵۷۴ کسان کېږي؛ له ایران او پاکستان نه افغانستان ته ستنې شوې دي. د دغه کمېسیون د معلوماتو پر بنسټ؛ له ستنو شویو کورنیو سره اړینې مرستې هم شوې دي.
په کابل کې د ایران سفارت د افغانستان په بېلابېلو ولایتونو کې د سېلابونو له امله د خلکو پر مړینې او ټپي کېدو خواشیني څرګنده کړې او له زیانمنو کورنیو او پاتې کسانو سره یې خپله خواخوږي ښودلې ده.
په خیبر پښتونخوا او د پاکستان په پنجاب ایالت کې د وروستیو ورښتونو له امله لږترلږه شپږ کسان مړه او ۱۶ نور ټپیان شوي دي. د راپور له مخې؛ دغه پېښې تر ډېره په پنجاب او خېبر پښتونخوا کې د چتونو او دېوالونو پریوتو له امله رامنځته شوې دي.
یوه امریکایي چارواکي الجزیرې شبکې ته ویلي، د هغې اېف-۱۵ جنګي الوتکې دویم پیلوټ چې په ایران کې نسکوره شوې وه؛ له یوې سختې نښتې وروسته موندل شوی او ژغورل شوی دی، خو امن ځای ته یې د لېږدولو عملیات لاهم روان دي.
په کابل کې دوه شپې وړاندې د سختو ورښتونو او زلزلې له امله له ایران نه تازه ستنه شوې یوه ۹ کسیزه کورنۍ تر خاورو لاندې شوه، چې په پایله کې یې ۸ کسان مړه او یو دوه نیم کلن ماشوم ژوندی پاتې شو.
په زابل کې د طالبانو تر واک لاندې له پېښو سره د مبارزې او چمتووالي ریاست خبر ورکړی، چې په دغه ولایت کې د سېلابونو له امله یو کس مړ او یو بل ټپي شوی دی. د یاد ریاست په وینا؛ د دغه سېلابونو له امله ۸۲ کورونه او ۵۷ جریبه کرنیزه ځمکه ویجاړه شوې ده.