د اسلامي همکاریو سازمان اعلان کړی، چې د دغه سازمان یوه پلاوي له طالب چارواکو سره پر مهمو موضوعګانو لکه زغم، په اسلام کې اعتدال، د نجونو د زدهکړو او د ښځو د کار په اړه خبرې کړې دي.
طالبانو د دغې غونډې په اړه په خپله خپره شوې خبرپاڼه کې بیا د ښځو د موضوعګانو په اړه د خبرو په اړوند څه نه دي لیکلي.
دغه پلاوی د پنجشنبې په ورځ کابل ته راغی او په تېرو دوو ورځو کې یې په کابل کې د طالبانو د بهرنیو چارو له وزیر امیرخان متقي او بیا په کابل کې د طالبانو د رئیسالوزرا له سیاسي مرستیال مولوي عبدالکبیر سره خبرې وکړې.
د اسلامي همکاریو سازمان د جمعې په ورځ هیله څرګنده کړه، چې له طالب چارواکو سره به د بېلابېلو اندېښنو د حل په موخه د دوی ناستې دوام وکړي.
د اسلامي همکاریو د سازمان سرمنشي حسین ابراهیم طه تر دې مخکې له غړو هېوادونو وغوښتل، چې د علم، ټکنالوژۍ او د ښځو د حقونو په اړه د پوهاوي په برخه کې د ښځو او نجونو د ونډې اخیستو لپاره هڅې زیاتې کړي.
طالبانو په خپله خبرپاڼه کې د اسلامي همکاریو د سازمان له پلاوي سره د لیدنې په اړه څه نه دي لیکلي.
د طالبانو د ارګ لهخوا په خپره شوې خبرپاڼه کې راغلي، مولوي عبدالکبیر د اسلامي همکاریو د سازمان له پلاوي سره په کتنه کې په افغانستان کې د جګړې د پای ته رسېدو په اړه خبرې کړې او ادعا یې وکړه، چې په افغانستان کې ژبني، قومي او مذهبي اختلافاتو ته ځای نه شته.
په دغې کتنه کې امیرخان متقي د اسلامی همکاریو له سازمانه وغوښتل، چې د دغې ډلې د حکومت ملاتړ وکړی.
تر دې وړاندې د طالبانو د امر بالمعروف او نهی عن المنکر وزارت د اسلامي احکامو له مخې موسیقي منعه اعلان کړې.
تېره اونۍ هم د لغمان ولایت په اړونده یوه سیمه کې کله چې د واده د موټرو په کاروان د موسیقۍ غږولو په غبرګون طالبانو ډزې کړې وې، له امله یو تن لاروی وژل شوی و.
څو اونۍ مخکې په بېلابېلو عملیاتو کې د طالبانو د امر بالمعروف وزارت محتسبینو د افغانستان په بېلابېلو سیمو کې د موسیقۍ الې سوځولې او له منځه وړې وې، چې د افغان هنرمندانو سختې نیوکې یې راپارولې وې.
له دې سره تېره میاشت د کابل ځینو اوسېدونکو ادعا کړې وه، چې د دغه وزارت محتسبین په ښار کې د خلکو ګرځنده ټلیفونونه ګوري چې سندرې په کې نه وي او مېموري کارټونه یې هم اخلي.
