څلور ورځې وروسته له هغې چې له پاکستاني پوله ساتو سره د طالبانو له نښتې وروسته د تورخم دروازه وتړل شوه، دغې ډلې د دروازې تړل او پر طالبانو د پاکستاني پوځیانو ډزې د «ښه ګاونډیتوب خلاف» کړنه بللی. طالبانو، پاکستان ته د خبرو اترو وړانديز کړی
د دې ستونزې د حل لپاره د طالبانو د بهرنیو چارو وزارت له پاکستان سره د ډیپلوماټیکو خبرو غوښتنه وکړه.
د تورخم دروازه د چهارشنبې په ورځ (د وږي۱۵ مه) د وسلوالو طالبانو او پاکستاني پوله ساتو تر منځ له نښتې وروسته وتړل شوه.
د طالبانو د بهرنیو چارو وزارت د شنبې په ورځ (د وږي ۱۸مه) د پاکستاني ځواکونو او طالبانو ترمنځ د نښتې د لامل په اړه یوه اعلامیه خپره کړه او پکې لیکلي یې دي: «پاکستاني ځواکونو پر افغان پوله ساتوځواکونو هغه مهال ډزې وکړې چې (دوی) د یوې پخوانۍ جوړې شوې امنیتي پوستې په بیا رغاونه بوخت شول.»
سیمه ییزو سرچینو افغانستان انټرنشنل ته ویلي، ډزې هغه مهال پیل شوې، چې وسله والو طالبانو د تورخم دروازې ته څېرمه د پوستې جوړول پیل کړل او پاکستاني عسکرو یې د مخنیوي هڅه وکړه.
دغه وزارت د وارداتو په برخه کې د پاکستان اقتصادي اړتیا ته په اشارې سره ویلي چې د تورخم بندر تړل به د دواړو هېوادونو او سیمې پر سوداګرۍ ناوړه اغېز وکړي.
د طالبانو د بهرنیو چارو وزارت پاکستان د کراچۍ په بندر کې د ستونزو په رامنځته کولو تورن کړی او ویلي يې دي چې، «هغه مهال چې د افغانستان کرنیز محصولات او تازه میوې را واردیږي، نو په ناحقه راپورته شي او دروازې را باندې وتړي.»
د طالبانو د بهرنیو چارو وزارت ټینګار کړی چې د پاکستان دغه کړنې د دواړو هېوادونو د ولسونو ترمنځ واټن زیاتوي.
د طالبانو بهرنیو چارو وزارت له افغانستان څخه د مالونو او تجهیزاتو د سلګونو کانټینرونو درول، د واګه بندر په لاره کې د افغان انځرو د ډکې لارۍ سوځول او د تورخم لارې بندول د نړیوالو قوانینو له مخې د ټولو پخوانیو شويو ژمنو خلاف کړنه بولي.
خو د طالبانو د بهرنیو چارو وزارت له پاکستانه غوښتي چې د سوداګرۍ، ټرانزیټ او د سیمې د اقتصاد د پیاوړتیا لپاره دې د تفاهم او ډیپلوماټیکو خبرو اترو لاره خپله کړي.
دغه وزارت وايي:«مه پرېږدئ! چې سیاسي او نورې مسلې د خلکو اقتصاد، سوداګرۍ او ازاد تګ راتګ ته زیان ورسوي.»
