د طالبانو د ریاستالوزراء اقتصادي مرستیال ملا عبدالغني برادر د یوې غونډې پر مهال امر کړی چې د دغې ډلې ټولې ادارې دې د کورنيو محصولاتو او تولید د ملاتړ په موخه، خپل اړتيا وړ او خوراکي توکو اخیستلو کې کورنیو محصولاتو ته لومړیتوب ورکړي.
د طالبانو د ریاستالوزراء اقتصادي مرستیال که څه هم د کورنیو محصولاتو او تولید څرنګوالی د بهرنیو توکو په پرتله له لس تر پنځلس سلنې ټیټ بولي، خو بیا هم ټینګار کوي چې له کورني تولید باید ملاتړ وشي.
دغه غونډه چې په مرمرین ماڼۍ کې د طالبانو د ریاستالوزراء د اقتصادي مرستیال ملا عبدالغني برادر په مشرۍ جوړه شوې وه، د مالیې، کورنیو چارو، صنعت او سوداګرۍ، اقتصاد وزارت، د استخباراتو ریاست او خصوصي سکټور غړو پکې برخه اخیستې وه.
په دغه غونډه کې همداراز پرېکړه شوې چې د افغانستان د صنعت او کانونو خونه به کورني تولیدات د رسمي لیک له لارې د تعرفې کمېټې ته ور پیژني، چې د څرنګوالي او څومره والي او قیمت له معلومولو وروسته د ځان بسیاینې په اندازه پر دغو وارداتي توکو تعرفه لوړه کړي.
له دې سره، د طالبانو له واکمنۍ وروسته په افغانستان کې د صنعتکارانو او پانګوالو پر وړاندې امنیتي حالت لویه ننګونه ده.
اړوند مسوولانو په دغه غونډه کې یو ځل بیا د صنعتکارانو او پانګوالو امنیتي ستونزو ته د رسېدنې په برخه کې پر جدي پاملرنې ټینګار وکړ.
