د روسیې ولسمشر د جمعې په ورځ په بشکیک کې د ګډو ګټو د خپلواکو هېوادونو په غونډه کې د افغانستان د وضعیت په اړه خبرداری ورکړ. ولادیمیر پوتین ویلي، چې له افغانستان څخه ډېر ګواښونه شته او روسیه له افغانستان څخه د ګواښونو په اړه د تاجکستان د اندېښنو ملاتړ کوي.
د تاس خبري اژانس د خبر له مخې پوتین وویل: زه د افغانستان له خاورې د ګواښونو په اړه د تاجکستان د اندیښنو ملاتړ کول مناسب ګڼم. "په دې هیواد کې وضعیت پیچلی دی."
ولسمشر امام علي رحمان په وار وار خبرداری ورکړی چې ترهګر د افغانستان په پولو کې په فعاله توګه شته او هڅه کوي چې تاجکستان او منځنۍ اسیا ته ننوځي.
د روان کال په پسرلي کې د تاجکستان د ملي امنیت کمېټې اعلان وکړ چې له افغانستان سره پر پوله یې درې ترهګر په نښه او وژلي دي.
تاجکستان اعلان وکړ، چې دغه کسان د "جماعت انصارالله" ډلې غړي وو او په دغه هېواد کې یې د ترهګریزو بریدونو د ترسره کولو هوډ درلود.
پر دې سربېره په تېرو دوو کلونو کې داعش له افغانستانه پر تاجکستان څو راکټونه توغولي او په کابل کې د روسیې سفارت مخې ته یې ځانمرګي برید کې دوه روسي ډیپلوماټان وژلي دي.
د روسیې او تاجکستان ولسمشرانو د جمعې په ورځ (د میزان ۲۱مه) د ګډو ګټو د خپلواکو هېوادونو د غونډې په څنډه کې جلا جلا وکتل او د افغانستان په اړه یې خبرې وکړې.
وروسته له هغه چې طالبان په ۱۴۰۰ میلادي کال کې واک ته ورسېدل، روسیې په تاجکستان کې خپله پوځي اډه په عصري تجهیزاتو سمباله کړه چې د پولو د ساتنې د پياوړتیا لپاره یې کار پیل کړ.
روسیه، اذربایجان، ارمنستان، ازبکستان، بیلاروس، تاجکستان، قرغزستان، قزاقستان او مالداویا د ګډو ګټو د خپلواکو هېوادونو ټولنې غړي دي.
د ارمنستان لومړی وزیر نیکول پاشینیان په نننۍ غونډه کې حاضر نه و.
