د ملي جمهوري غورځنګ د زدکوونکو سازمان په پښتونخوا او بلوچستان کې د بې قانونه افغان کډوالو په ملاتړ لاریون وکړ. دغو زدکوونکو د پاکستان له حکومت وغوښتل چې افغانستان ته د بې قانونه کډوالو د ستنولو پرېکړه واخلي.
په دې مظاهرو کې پرون د پښتونخوا د پېښور پوهنتون او اسلامیه کالج، د بنو او ډېره اسماعیل خان پوهنتونونو او د بلوچستان د هرنايي زدکوونکو ګډون درلود.
دغو مظاهره چیانو پرون خپلو مظاهرو کې د پاکستان له حکومت دا غوښتنه هم وکړه چې له افغانانو سره «ناانساني چلن، ظلم او جبر بند کړي.»
د پاکستان کورنیو چارو وزارت د روانې اکتوبر میاشتې په لومړیو کې په دغه هېواد کې بې قانونه کډوالو ته د اکتوبر تر وروستۍ نېټې د وتلو لپاره وخت ور کړی دی.
تر دې مخکې هم په پاکستان کې مختلفو ګوندونو او سیاسي مشرانو په مظاهرو او ویناوو سره د پاکستان د حکومت وروستۍ پرېکړه غندلې ده.
خو د پاکستان د کورنیو چارو سرپرست وزیر د جمعې په ورځ بیا ویلي، بې قانونه کډوالو ته د اکټوبر تر وروستۍ نېټې ور کړل شوې موده کې کوم سازش نه کېږي.
د پاکستان حکومت وايي، په دغه هېواد کې ۴.۴ میلیونه افغان کډوال اوسېږي چې ۱.۷ میلیونه یې بې قانونه دي.
د ملګرو ملتونو او بښنې نړیوال سازمان په ګډون مختلفو ادارو له اسلام اباد غوښتي چې د افغان کډواول په هکله وروستۍ فیصله بېرته واخلي.
