د افغانستان د پخواني پاچا غازي امان الله خان لور شهزادګۍ هندیه د ۹۴ کلونو په عمر په ایټالیا کې مړه شوه. د شهزادګۍ هندیه لور ثریا ملک پر فیسبوک د خپلې مور مړینه تایید کړې او لیکلي یې دي چې هندیه د شنبې په شپه -د تلې په ۲۱مه- نېټه د ایټالیا په روم ښار کې مړه شوه.
ثريا ملک ليکلي چې «په افغانستان کې د تېرو څلورو لسيزو ګډوډيو په ترڅ کې بي بي هندیه جانې په پرله پسې توګه هڅه کوله چې له خپلو هېوادوالو سره مرسته وکړي او د افغانانو د ژغورنې لپاره نړيوال ملاتړ ترلاسه کړي».
اغلې ملک زیاته کړې، چې شهزادګۍ هندیه د اروپا په بیلابېلو ښارونو کې په خپلو ویناوو کې ډېره هڅه وکړه چې د نړۍ پام په ۲۰۰۱-۱۹۹۶ میلادي کلونو کې د ښځو پر وړاندې د طالبانو د ناسمو سیاستونو په لور راواړوي.
هغه د شاه امان الله او ملکې ثریا له نهو اولادونو څخه یوه وه. شهزادګۍ هندیه د خپل پلار له ګوښه کېدو پنځه میاشتې وروسته د ۱۹۲۹میلادي کال د جنورۍ په ۱۴ مه د هند په ممبۍ ښار کې وزېږیده او وروسته بیا له خپلې کورنۍ سره ایټالیا ته ولاړه.
شهزادګۍ هندیه خپلې زدکړې په سوییس او وروسته یې د روم ښار په ګریګوري پوهنتون کې پای ته ورسولې.
هغه په لومړي ځل په ۱۹۶۸ میلادي کال کې افغانستان ته راغله.
غازي الله خان د افغانستان عصري پاچا و چې اروپا ته له سفر وروسته یې پراخ سیاسي او ټولنیز اصلاحات پیل کړل. تر دې سفر وروسته شاه امان الله د نجونو د ښوونځیو په ګډون څو ښوونځي جوړ کړل.
خو د شاه امان الله اصلاحات د یو شمېر عالمانو او قومي مشرانو د مخالفت له امله ناکام شول.
