د ماشومانو د خوندیتوب نړیواله خیریه ادارې (سیف دې چلډرن) په هرات کې پر ماشومان د زلزلو د اغېزو په اړه ژوره اندېښنه ښودلې. دغه اداره وايي، تر زلزلو مخکې لا افغانستان د لوږې له بې ساري ناورین سره مخ و.
د ماشومانو د خوندیتوب نړیوالې خیریه ادارې د افغانستان په لویدیځ هرات ولایت کې د دوو خونړیو زلزلو له امله د ماشومانو د ژوند د ګډوډېدو په اړه اندیښنه ښودلې ده.
دغه اداره وايي، د اوکټوبر په اوومه او ۱۱مه په هرات ولایت کې د دوو زورورو زلزلو امله نېږدې ۳ زره کسان مړه او ټپیان شوي، او لږ تر لږه ۱۱زره او ۶۶ کسان د لومړۍ زلزلې له امله زیانمن شوي او د دوی د اټکل له مخې ۶ زره نورکسان د دويمې زلزلې له امله زیانمن شوي.
د ماشومانو د خوندیتوب نړیواله خیریه اداره وایی، دا په ناورین پسې ناورين دی.
دوی وايي، د زلزلې له ناورین څخه وړاندې په ټول افغانستان کې ماشومان له سختې لوږې سره مخ وو، او د زلزلې ناورین به د یادو ماشومان ژوند نور هم سخت کړي.«ماشومان په ټوله سیمه کې د زلزلې د دوام له امله وېره لري، او ډیریو یې هر څه له لاسه ورکړي، په زرګونو ماشومان بې کوره شوي او په ازاده فضا کې خوب کولو ته اړ شوي.»
دغه اداره وايي، ۳،۲ میلیونه ماشومان په جدي ډول د خوړو خوندیتوب نه لري.
د ماشومانو د خوندیتوب نړیواله خیریه اداره وايي، د تېرو ۴۷ کلنو راهیسې په افغانستان کې د روغتیا، خوړو، ښوونې او روزنې، د ماشومانو د خوندیتوب، سرپناه، اوبو او د خوړو د خوندیتوب په برخو کې کار کوي، خو د اوسني کړکېچ اندازه او شدت په خورا پراخه کچه دی.
دغه اداره اوس په هرات کې د زلزلو له امله د اغېزمنو سیمو لپاره د بیړنیو مرستو رسولو تر څنګ بیړنۍ نغدې مرستې هم چمتو کوي.
