نن یکشنبه د (تلې ۲۳مه) په نړیوال جام کې د افغانستان درېيمه لوبه ده او یاده لوبه یې د تېر نړیوال جام له اتلې لوبډلې انګلستان سره ده. د افغانستان کرېکټ بورډ وايي، د کرېکټ ملي لوبډلې يې د انګلستان سره د لوبې لپاره بشپړ چمتوالی نیولی دی.
د افغانستان او انګلستان لوبډلې نن یک شنبې د کابل پر مهال یوه بجه د سیالۍ ډګر ته کښته کیږي.
دغه سیالۍ په آرون جټلې لوبغالي کې ترسره کیږي، هغلته چې افغانستان خپله مخکنۍ لوبه کوربه هیواد هند لوبډلې ته بایللې وه.
انګستان په روان نړیوال جام کې خپله لومړی لوبه نیوزیلینډ ته بایللي وه، خو دويمه لوبه یې بیا له بنګله دېش څخه وګټله.
خو په روان نړیوال جام کې افغانستان خپلې تېرې دوه لوبې بنګله دېش او هند ته بایلې دي.
افغانستان د نورو نړیوالو جامونو په څېر دا ځل هم نړیوال جام په ماتو خوړولو پیل کړی دی.
د افغانستان د کرېکټ ملي لوبډلې مینه وال هیله لري چې افغانستان دا ځل د ۲۰۲۳ کرېکټ نړیوال جام څخه تش لاس را ستون نه شي.
کرېکټ پوهان وايي، افغان لوبډله د آرون جټلي لوبغالي سره بلده ده، او په تېره لوبه کې یې د هند لوبډلې ته د توپ وهنې پرمهال د منډو جوړولو ښه هدف ټاکلی و.
نیمه پایلوبې ته د ورتګ لپاره د افغانستان لپاره د نن لوبې ګټل خورا اړین دي.
که نن افغان لوبډله پچه وګټې او د توپ وهنې پرېکړه وکړي، ښايي خپلې سیالې لوبډلې ته سرخوږی جوړ کړي.
