د روغتیا نړیوال سازمان د یکشنبې په ورځ اعلان وکړ چې د جاپان د نړیوالې همکارۍ سازمان به د افغانستان د روغتیا له سکتور سره ۶.۹ میلیونه ډالره مرسته وکړي. تمه کیږي چې په ټول افغانستان کې تر ۷۶زره ډیر کسان چې په ساري ناروغیو اخته وي، ورته پام وشي.
د روغتیا نړیوال سازمان ویلي، چې له دې مرستې موخه د ساري ناروغیو ناروغانو ته د روغتیايي خدمتونو وړاندې کول او له لابراتوارونو سره مرسته ده، چې د ساري ناروغیو په سمه توګه تشخیص وشي.
د دغه تړون د لاسلیک په مراسمو کې په افغانستان کې د جاپان سفیر د ساري ناروغیو د کمولو په برخه کې د جاپان د هڅو پر ملاتړ ټینګار وکړ.
تاکایوشي کرومیا وویل: «زه د زړه له تله هیله کوم چې افغانستان یو داسې هیواد شي چې ټول ماشومان، ښځې او نارینه پکې د ساري ناروغیو له کمېدو او مخنیوي وروسته په سوکالۍ سره ژوند وکړي.»
څه موده وړاندې د روغتیا نړیوال سازمان په یوه راپور کې د افغانستان د روغتیايي سیستم د جدي زیان په اړه خبرداری ورکړ.
د دغه سازمان په راپور کې راغلي چې په افغانستان کې د خوراکي توکو د نه خوندیتوب، د ساري ناروغیو د خپرېدو او د پرله پسې وچکالۍ له امله د میلیونونو خلکو ژوند له ګواښ سره مخ دی.
همدارنګه د روغتیا نړیوال سازمان د هوا د ککړتیا له امله په ساړه موسم کې د ساري او تنفسي ناروغیو د خپرېدو په اړه اندېښنه ښودلې ده.
