د اسراييل ولسمشر اسحاق هرزوګ ويلي، چې د نورو یرغمل شویو کسانو د خوندي خوشې کولو لپاره چې د حماس له خوا نیول شوي دي، هېواد يې په غزه کې له حماس سره د نوي موقتي اوربند هوکړې ته لېوال دى.
هرزوګ د سې شنبې په ورځ د سفیرانو یوې غونډې ته وویل: «اسراییل د یرغمل شویو کسانو د خوشې کولو لپاره یوې بلې بشري وقفې او اضافي بشري مرستو لپاره چمتو دی.»
حماس وايي؛ تر هغه به د بنديانو د خوشې کولو په اړه خبرو ته حاضر نه شي، چې اسراييل په غزه کې خپله جګړه پای ته نه وي رسولې.
دا څرګندونې په داسې حال کې کېږي، چې پر اسراییل د نړۍوالو فشارونه زیات شوي چې پر غزې خپل بریدونه ودروي او محاصره شوې سیمې ته د بشري مرستو د رسولو اجازه ورکړي.
د اسراییل او حماس ترمنځ تېر تړون چې د نومبر په پای کې د یوې اونۍ اوږد اوربند لامل شو؛ د قطر او مصر په منځګړیتوب ترسره شو، چې حماس د اسراییل په زندانونو کې د ۲۴۰ فلسطیني مېرمنو او ځوانانو په بدل کې د ۸۶ اسراییلي ښځې او ماشومان خوشې کړل. همداراز د دې اوربند په لړ کې حماس ۲۴ بهرني اتباع هم خوشې کړل.
د قطر لومړي وزیر محمد بن عبدالرحمن ال ثاني د موساد مشر ډیویډ برنیا او د سي ای اې له مشر بیل برنز سره د دوشنبې په ورځ په پولنډ کې د یرغمل شویو کسانو په بدل کې د اسراییل په زندانونو کې د فلسطینيانو خوشې کول لپاره د احتمالي نوي تړون او په جګړه کې د بشري وقفې په اړه خبرې وکړې.
حماس د سې شنبې په ورځ په یوه بیان کې وویل، چې «د اسراییل د نسل وژنې جګړې په دوام سره» د بندیانو د تبادلې په اړه هر ډول خبرې اترې ردوي.
د فلسطین د روغتیا وزارت د سې شنبې په ورځ وویل، چې د غزې په تړانګه کې د اسراییل د بریدونو له امله د اکټوبر له اوومې راهیسې د وژل شویو فلسطینیانو شمېره ۱۹ زره او ۶۶۷ کسانو ته لوړه شوې ده.
بلخوا، د حماس په برید کې شاوخوا ۱۲۰۰ اسراییلیان وژل شوي او تر ۱۳۰ ډېر یرغمل دي.
