د پوځ په بندخونه کې د دریو کشمیریانو وژل کېدو د هند تر کنټرول لاندې د دغې سیمې د خلکو غوسه او اعتراضونه راپارولي دي. د اېسوشېیتیډ پرس په وینا، د دغو ولسي وګړو کورنۍ وايي، چې د وژل شویو کسانو په بدنونو یې د «سختو ربړونو» نښې لیدلې دي.
د کشمیر د پونچ ولسوالۍ اوسېدونکو د هند پوځ تورن کړی چې په یوه پوځي پنډغالي کې یې درې ولسي وګړي ربړولي دي.
د دغو کسانو مړي د سيمه ييزو پوليسو له لوري د هغوى کورنيو ته سپارل شوي دي.
ځايي خلک وايي، هندي پوځ تېره جمعه په پونچ ولسوالۍ کې نهه کسان نيولي دي. له دوی څخه یو تن چې بوډا و، خوشې شوی دی.
د دغو بندیانو کورنیو ویلي، چې پنځه تنه نور له سختو ځورولو او وهلو وروسته روغتون ته وړل شوي دي.
د راپورونو له مخې، د دغو کسانو له نیول کېدو څو ساعته وروسته د هندي پوځ له خوا د هغوی د ربړولو ویډیوګانې په ټولنیزو شبکو کې خپرې شوې؛ چې د خلکو غوسه یې راوپاروله.
اېسوشېیټیډ پریس راپور ورکړی چې هندي چارواکو د شنبې په ورځ په مجازي نړۍ کې د ویډیوګانو د لا خپرېدو او احتمالي اعتراضونو د مخنیوي لپاره انټرنیټي خدمتونه بند کړل.
خو د هند تر ولکې لاندې کشمیر په اصلي سیمه سرینګر کې لاریونونه وشول.
د هند پوځ د شنبې په ورځ ناوخته په یوه بیان کې اعلان وکړ چې په پونچ سیمه کې یې د «دریو ملکي وګړو د وژل کیدو راپورونه» ترلاسه کړي دي. پوځ زياته کړې چې په دې اړه څېړنې کوي.
تر دې وړاندې هم په کشمیر کې د هندي پوځیانو له خوا د ولسي وګړو د ځورونې راپورونه ورکړل شوي دي.
د وسله والو ځواکونو د ځانګړو واکونو قانون د هند پوځ ته اجازه ورکوي چې د محکمې له ویرې پرته شکمن کسان وپلټي، بندیان یې کړي او آن ډزې پرې وکړي.
هند له اوږدې مودې راهیسې تر خپل کنټرول لاندې کشمیر کې د خپل واک ساتلو لپاره په لوی نظامي شتون تکیه کوي. وسله والې ډلې له ۱۹۸۹ کال راهیسې په کشمیر کې د نوي ډیلي د حکومت پر ضد جنګیږي.
نوی ډیلی پر اسلام اباد تور لګوی چې په کشمیر کې د مسلمانو وسله والو ډلو ملاتړ کوي. پاکستان دا ادعا رد کړې، خو ویلي یې دي چې د دوی مبارزه مشروع او د ازادۍ لپاره ده.
