د رویټرز خبري اژانس د راپور له مخې؛ تهران د ۲۰۲۳ کال په لومړیو شپږو میاشتو کې د «یواف۶» هکسافلورید اورانیمو د تولید پخوانۍ کچې ته راستانه شوي دي.
د جون په میاشت کې ایران د پام وړ غني شويو یورانیمو تولید په میاشت کې درې کیلوګرامو ته راټیټ کړ.
د اټومي انرژۍ نړۍوالې ادارې غړو هېوادونو ته په خپل راپور کې ویلي، چې تهران د فردو په سیمه کې چې د یورانیمو د بډایه کولو له دوو ځایونو څخه یو دی، چې تر ۶۰ سلنې پورې د یورانیمو د تولید په کچه کې یې د بدلون خبر ورکړی دی.
د دغه راپور له مخې؛ د تهران د بډایه شویو يورانيمو د توليد د زياتوالي پرېکړه د (نومبر ۲۲) عملي کړې ده.
تر دې مخکې د اتومي انرژۍ نړۍوالې ادارې اعلان کړی و، چې د روان کال د سپټمبر میاشتې په پرتله د ایران ۵٪، ۲۰٪ او ۶۰٪ بډایه شویو یورانیمو زیرمې زیاتې شوې دي.
د اټومي انرژۍ د نړۍوالې ادارې مشر رافایل ګروسي پر نړۍوالو قدرتونو غږ وکړ، چې د ایران له حکومت سره د دغه هېواد د اټومي پروګرام په اړه خبرې اترې بیا پیل کړي.
ګروسي تېره میاشت د فرانس ۲۴ ټلویزیوني چینل سره په مرکه کې د ایران اسلامي جمهوریت د اټومي پروګرام په اړه یو ځل بیا اندېښنه څرګنده کړه او ویې ویل چې تهران د اټومي بم د جوړولو لپاره اړین مواد او ظرفیت لري.
هغه د دې په بیانولو سره چې د تهران د اټومي پروګرام په اړه لا هم ډېرې پوښتنې بې ځوابه پاتې دي، وویل چې د نړۍوالې ادارې مفتشینو د ایران په هغو مرکزونو کې چې باید یورانیم پکې نه وي، په زیاته اندازه غني شوي یورانیم یا پروسس شوي یورانیم موندلي دي.
رويټرز خبري اژانس د نومبر په ٢٥مه نېټه ليکلي، چې د اټومي انرژۍ د نړۍوالې ادارې محرم راپورونه ښيي چې ايران د درېيو اټومي بمونو لپاره تر ٦٠ سلنې پورې په کافي اندازه غني شوي يورانيم لري او لا هم له دې ادارې سره په مهمو مسايلو کې همکاري نه کوي.
د رویټرز په وینا؛ د سپټمبر په ۱۳ د وروستي راپور راهیسې د ایران د یورانیمو ۶۰٪ بډایه شویو زیرمې ۱۲۸،۳ کیلوګرامو ته لوړ شوي.
دا اندازه د ۴۲ کیلوګرامو څخه درې چنده زیاته ده، چې د ادارې د تعریف له مخې؛ په نظرياتي توګه د اټومي بم د تولید لپاره که چیرې نور هم بډایه شي کافي کېدی شي.
د نړۍوال اژانس د حکومت د بورډ په تېره غونډه کې د امریکا او اروپايي ټولنې استازو له تهران څخه وغوښتل چې د خپل ۶۰ سلنه یورانیمو د بډایه کولو پروګرام ودروي.
