د ترکیې ولسمشر رجب طیب اردوغان وایي، چې د غزې په تړانګه کې د نتنیاهو کړنې د دویمې نړۍوالې جګړې پر مهال د نازي مشر هټلر له جنایتونو سره توپیر نه لري؛ خو په ځواب کې نتنیاهو اردوغان د کردانو په نسل وژنې تورن کړی او وایي اردوغان د اسراییل د موعظې لپاره اخلاقي صلاحیت نه لري.
دا لومړی ځل نه دی، چې د ترکیې ولسمشر رجب طیب اردوغان اسراییل او نازيان سره پرتله کوي.
د اسراییل او حماس ترمنځ د اوسنۍ شخړې له پیل راهیسې اردوغان په وار - وار په غزه کې د اسراییل پر پوځي عملیاتو نیوکې کړې دي.
همداراز د اسراییل لومړي وزیر بنیامین نتنیاهو ویلي، چې د غزې په تړانګه کې د اسراییل پوځ د یوې ترهګرې ډلې د له منځه وړلو لپاره جګړه کوي چې ترکیه یې د لوړ پوړو چارواکو کوربه دی.
نتنیاهو زیاتوي؛ د حماس د وسله والې ډلې ډېری مشران په ترکیه او قطر کې اوسیږي.
