د اسراییل پوځ د اکټوبر له اوومې او په غزه کې د جګړې له پیل راهیسې د دغه هېواد د ۵۰۱ پوځیانو او افسرانو د وژل کیدو خبر ورکړی. د حماس د برید په ترڅ کې ۲۷۴ پوځیان او ۳۸ افسران وژل شوي دي.
پر غزې د ځمکني برید په ترڅ کې د وژل شویو پوځیانو شمېر هم ۱۶۷ تنو ته رسېدلی دی.
د نښتو له پیل راهیسې له لبنان سره په پوله کې په بریدونو کې ۹ سرتیري وژل شوي، چې د حزب الله او د فلسطین اسلامي جهاد ډله له خوا یې مسوولیت منل شوی دی.
له حماس سره د جګړې له پیل څخه ۸۲ ورځې وروسته اسراییل بیا په غزه کې د دغه هېواد د پوځ د عملیاتو پر مهال د ملکي تلفاتو د شمېرو له خپرولو ډډه کړې ده.
اخوا د راپورونو له مخې؛ په غزه کې د جګړې له پیل څخه تر اوسه ۲۱ زره ۱۱۰ فلسطینیان وژل شوي او ۵۵ زره ۲۴۳ نور ټپیان شوي دي.
