په استانبول ښار کې د افغانستان کونسلګرۍ کې څو سرچینو افغانستان انټرنشنل ـ پښتو ته وویل، یوه میاشت وړاندې د طالبانو د بهرنیو چارو وزارت د امیر خان متقي په لاسلک یو مکتوب استنبول کې افغان کونسلګرۍ ته استولی وو چې پکې د طالبانو ډېپلوماټ مفتي محمد عظیم د کونسلګرۍ د سرپرست او محمد امین یعقوبي د کونسلګرۍ د مالي او اداري په توګه ګمارل شوی و.
د سرچینو په حواله محمد امین یعقوبي د طالبانو د بهرنیو چارو وزارت پر لومړي مکتوب عمل ونه کړ. یوه اوونۍ وړاندې طالبانو کونسلګرۍ ته د دوهم مکتوب په لېږلو سره محمد امین یعقوبي یې د کونسلګرۍ له مالي او اداري له دندې هم لرې کړ او مفتي محمد عظیم یې د کونسلګری د سرپرست په توګه ټاکلی دی.
په استانبول کې د افغانستان جنرال کونسل محمد امین یعقوبي افغانستان انټرنشنل ـ پښتو ته وویل، مفتي محمد عظیم له دوی سره په کونسلګرۍ کې ډېپلوماټ دی.
هغه د طالبانو له لوري د جنرال کونسل په توګه د ښاغلي عظیم پر ټاکل کېدلو بې خبري وښوده او دغه ګمارنه یې نه رد او نه هم تایید کړه.
طالبانو له تېر دوبي راهیسې د ترکیې استانبول ښار کې د افغانستان جنرال کونسلګرۍ ته د ګلمت خان ځدراڼ او مفتي محمد عظیم په نومونو د خپلې ډلې دوه ډېپلوماټان معرفي کړي دي.
خو سرچینې وايي، محمد امین یعقوبي د طالبانو له دویم مکتوب سره هم مقابله کوي او د دې ډلې له ډیپلوماټانو سره لاسر ګرېوان دی.
د معلوماتو له مخې د طالبانو بهرنیو چارو وزارت د محمد امین یعقوبي په اړه په کابل کې د ترکیې سفارت او د دغه هیواد بهرنیو چارو وزارت ته یو یاداښت لیږلی دی ترڅو د کونسلګرۍ چارې د دې ډلې ګمارل شوي کونسل ته وسپاري.
له بلې خوا په استانبول کې د افغانستان په کونسلګرۍ کې سرچینو افغانستان افغانستان انټرنشنل ـ پښتو ته وویل، محمد امین یعقوبي لا هم د ځان ټینګولو هڅه کوي او د طالبانو له لوري ګمارل شوی ډېپلوماټ ګلمت خان پر ځای یې یو بل محلي کارمند حمدالله حبیبي د کونسلګرۍ مالي او اداري مسوول ټاکلی دی او لاسلیک یې بانګ ته معرفي کړی دی.
د معلوماتو پر بنسټ په استانبول کې د افغانستان مالي چارو او له بانګ د پیسو د اېستلو لپاره دوه لاسلیکونه ضروري وي چې له دې وړاندې د کونسلګرۍ سرپرست محمد امین یعقوبي او د طالبانو د ډېپلوماټ ګلمت خان ځدراڼ لاسلیکونه معرفي شوي ول.
په کونسلګري کې سرچینې وايي، د طالبانو له لوري په استانبول کې ګمارل شوي جنرال کونسل مفتي محمد عظیم او د لرې شوي سرپرست جنرال کونسل محمد امین یعقوبي ترمنځ نندارۍ زیاتې شوې او په بانګ کې د کونسلګرۍ شاوخوا یو میلیون ډالرو د اېستلو په اړه اندېښنې موجودې دي.
له دې وړاندې په ترکیه کې یو شمیر افغان ډېپلوماټانو د طالبانو له خوا د ګوښه کېدو له امله غبرګون ښودلی و، خو بیا وروسته د ترکیې د بهرنیو چارو وزارت د مکتوب په لیږلو سره دوی له دندې ګوښه کړل او ترې ویې غوښتل چې یا دې د ډېپلوماټ پرځای عادي ویزې واخلي او یا دې هم په لسو ورځو کې د ترکیې له خاورې ووځي.
که څه هم ترکیه د طالبانو حکومت په رسمیت نه پېژني، خو دې ډلې ته یې اجازه ورکړې، چې په انقره کې د افغانستان سفارت او په استانبول کې د دغه هېواد کونسلګرۍ تر خپل کنټرول لاندې راولي.
د طالبانو د بهرنیو چارو وزارت سږ کال په استانبول کې د افغانستان په کونسلګرۍ کې خپل یو ډېپلومات وټاکه او د تېر حکومت درې ډېپلوماټان یې له دندو ګوښه کړل.
د افغانستان د پخواني حکومت سفیر امیر رامین لا هم په انقره کې د دغه هېواد د سفارت چارې پر مخ بیايي او د پخواني حکومت ډېری نور ډېپلوماتان اوس هم په ترکیه کې مېشت دي.
د طالبانو د بهرنیو چارو وزیر امیرخان متقي هم تېر اکتوبر په ترکیه کې د افغانستان سفارت ته لاړ او هلته یې له افغانانو او د سفارت له کارکوونکو سره وکتل.
د طالبانو له واکمنېدو دوه کاله او څلور میاشتې کېږي، خو یوازې دې ډلې ته پاکستان، ایران، متحده عربي اماراتو او چین افغان سفارتونه سفارلي دي.
په ځینې نورو هېوادونو لکه ترکیه، روسیه، ترکمنستان او سعودي کې د دوی ډیپلوماټان منل شوي، اما سفارتونه لا هم نه دي ور سپارل شوي.
