د پښتونخوا د پولیسو مشر وايي، روان میلادي کال په دغه صوبه کې له وسلوالو سره نښتو کې ۱۸۵ پولیس وژل شوي او څلور سوه نور ټپیان دي. اختر حیات خان وايي، سږني میلادي کال کې یې ۹۱۷ ترهګر نیولي او درې سوه نور یې وژلي دي.
نوموړي دا خبرې له جیو نیوز سره د پوره کال د امنیتي پېښو په هکله مرکه کې کړې دي چې راتلونکې یکشنبه یې وروستۍ نېټه ده.
هغه دا هم ویلي چې پولیسو د ۱۳۷ پېښو مخه نیولې ده.
د هغه په خبره، د پښتونخوا په دېره اسماعیل خان، ټانک او لکي مروت کې پولیس او استخبارات په ګډه د وسلوالو پرضد کار کوي.
اختر حیات خان د نورو پاکستاني چارواکو په څېر وايي، چې د دغه هېواد په امنیتي پېښو کې افغانان ښکېل دي.
نوموړی زیاتوي چې د سږ کال له ۱۵ پېښو یې په لسو کې د افغانانو لاس و.
پاکستاني چارواکي دا هم وايي چې د دغه هېواد ضد وسلوال په افغانستان کې دي او خپل بریدونه پلانوي، خو د طالبانو حکومت د اسلام اباد دا ادعاوې ردوي.
