په امریکا کې یوه ښځه تر جنسي تېري وروسته په ډزو وژل شوې او جسد یې سوځول شوی دی
د امریکا د میسي سيپي ایالت چارواکي وايي، چې د هغه شکمن په لټه کې دي چې یوه مېرمن یې لومړی په ډزو وژلې او بیا یې ورته اور اچولی دی.
د امریکا د میسي سيپي ایالت چارواکي وايي، چې د هغه شکمن په لټه کې دي چې یوه مېرمن یې لومړی په ډزو وژلې او بیا یې ورته اور اچولی دی.
په میسي سیپي ایالت کې د سکاټ حوزې پولیسو ویلي، چې د دغې وژنې تورن د سامې پټریک په نوم یو کس پېژندل شوی او دوی هڅه کوي چې ژر یې ونیسي.
د شنبې په ورځ له غرمې وروسته په دوو بجو پولیسو په ځنګل کې د یوې ښځې جسد ومونده، چې له جنسي تېري وروسته په ډزو ویشتل شوې او بیا سوځول شوې وه.
پولیسو د وژل شوې ښځې هویت لا نه دی په ډاګه کړی؛ خو د پېښې شکمن یې پټریک په ګوته کړی دی.
له دغې پېښې یوه اونۍ مخکې پولیسو پر فیسبوک د یوې اعلامیې په خپرولو سره له خلکو د پټریک په نیولو کې د مرستې غوښتنه کړې وه.
نوموړی د موټر د غلا په ګډون په یو شمېر نورو جرمونو هم تورن دی.
د افغانستان د جمهوريغوښتونکو خوځښت د یوې تازه اعلامیې په خپرولو سره ویلي، چې په افغانستان کې یوناما د افغانستان د ستونزې د حل په برخه کې د یوې نړۍوالې اجماع رامنځته کولو کې پاتې راغلې او په مبهمه توګه له واکمنې مستبدې ډلې سره د نړۍوال تعامل په پراخولو ټینګار کوي.
د جمهوري غوښتونکي خوځښت په باور د یوناما داسې هڅې په افغانانو کې د ملګرو ملتونو اعتبار او حیثیت ته زیان اړولی.
دغه خوځښت ټینګار کوي، چې نړۍ ته ښايي، چې په سولهییزه بڼه افغانانو ته د خپلې سیاسي ارادې د پلي کولو لار هواره کړي.
د دغه خوځښټ په اعلامیه کې راغلي چې د افغانستان ستونزه د کورنۍ ستونزې ترڅنګ نړۍوال او سیمه ییز اړخونه هم لري.
د جممهوري غوښټونکي ځوځښت په اعلامیه لیکل شوي: ”نور نو د افغانستان خلک وروستیو پېښو ته په پام نه د سیمې او نه هم په نورو ځواکمنو هېوادونو باور لري، چې په یوازې سر دې د افغانستان د ستونزې په حل کې څه وکړلی شي. د کورني مشروعیت او اجماع تر څنګ د دغې کشالې د حل لپاره یوې نړۍوالې اجماع ته هم اړتیا شته، چې ښايي یوازې د ملګرو ملتونو په شان د یوه معتبر او اعتماد وړ سازمان په عملي هڅو راجوړه شي.“
دغه خوځښت په دې باور دی، چې یوناما په دې وروستیو کې اړمنو افغانانو ته ان د بشري مرستو رسولو په برخه کې هم کومه ځانګړې وړتیا ښودلې نه ده او په سیاسي برخه کې یې د افغانستان د خلکو اساسي بشري حقونه، د ښځو محرومیتونه او د هغوی په وړاندې جنسیتي تبعیض په پام کې نه دی نیولی او د ټولو افغانانو په ګډون د یوه ولسواک او قانونمند ملي حکومت د جوړېدو لپاره کار نه دی کړی.
په اعلامیه کې د ۲۰۲۳ کال په وروستیو ورځو کې د ملګرو ملتونو د امنیت شورا له خوا د افغانستان په اړه تصویب شوي پرېکړه لیک ته اشاره شوې او ویل شوي، چې کېدی شي دا پرېکړه لیک تر یو بریده د افغانستان ستونزې ته د نړۍوالو د پام اړولو یوه نښه وبلل شي.
د دغه خوځښت اعلامیه کې راغلي:”په دې پرېکړه لیک کې د افغانستان د وضعیت په اړه د څرګندو اندېښنو د بیان پر بنسټ د دغه هېواد لپاره د ملګروملتونو د سرمنشي د یوه ځانګړي استازي د ټاکل کېدو پرېکړه هم شوې ده، چې ښايي د افغانستان حالاتو ته د نړۍ د دغه تر ټولو مهم سیاسي – بشري سازمان نوي تعامل ته لار هواره کړي.“
دغه غورځنګ په دې باور دی، چې د افغانستان ستونزه د نیابتي جګړو په اوږدېدو حل کېدلی نهشي؛ له بلې خوا حاکم استبداد او په وطن کې روان بشري ناورین هم نور د زغملو وړ نه دی.
د جمهوري غوښتونکي خوځښت اعلامیه کاږي:”موږ فکر کوو، چې که دې ټولو واقعیتونو ته په پام د سرمنشي یو باصلاحیته استازی وکړی شي، د یوې نړۍوالې اجماع په رامنځته کولو د افغانستان سیاسي – بشري ستونزه حل ته نېږدې کړي، ښايي د یاد سازمان د لا نور بېباوره کېدو مخه به یې تریوه بریده نیولي وي.“
د چین ولسمشر د نوي کال په وینا کې د تېر کال پرتله په ځواکمنه لهجه نن وویل، چې له تایوان سره بیا یووالی مهم دی او هرو مرو به دا اتحاد پېښ شي. چین تایوان ته د خپلې یاغي سیمې په سترګه ګوري او د هغه د خپلولو لپاره یې هېڅ وخت له خپل هڅو لاس نه دی اخیستی.
که څه هم پر دولتي تلوېزون خپره شوې وینا کې نن د چین ولسمشر د پوځي ګواښ خبره ونه کړه؛ خو زیاته کړه یې کړه چې له مور وطن سره یووالی مهم او ډډه ترې نه شي کېدلی.
خو شین هوا دولتي خبري اژانس د نوموړي د خبرو انګرېزي ژباړه په ساده ټکو کړې او لیکلي یې دي: «چین به هرو مرو متحد شي.»
په دې اژانس کې د نوموړي له قوله ویل شوي، د تایوان تنګي دواړو خواوو ته ټول چینایان باید یو ګډ هدف پورې وتړل شي او هغه دا چې د چینايي ملت په ځوانولو کې ونډه واخلي.
تېر کال شی جن پینګ په ورته وینا کې ویلي وو؛ د تنګي دواړو خواوو ته خلک د یوې کورنۍ غړي دي.
هغه هیله ښودلې وه، چې د دواړو خواوو خلک له یو بل سره په همکارۍ د چینايي ملت پرمختګ پیاوړی کړي.
د نوموړي دا خبرې په تایوان ټاپو کې د نوي مشر د ټاکل کېدو له څه کم دوه اونۍ مخکې دي.
د جنورۍ پر ۱۳ تایوان کې ولسمشرۍ او پارلماني ټاکنې په داسې حال دي، چې د بېجینګ تاو تایپي اړیکي خورا ترینګلي شوي دي.
چین پر تایوان چې په ډېموکراټیکه توګه اداره کېږي د خپل حاکمیت تثبیتولو لپاره پوځي فشار ډېروي.
خو د بېجینګ چارواکي د تایوان په ټاکنو کې د ولسمشر د مرستیال لای چینګ ته چې نظر پوښتنو کې مخکښ دی د سخت بېلتونپال په سترګه ګوي.
د پاکستان پوځ وايي، د پښتونخوا په باجوړ کې یې نن درې وسلوال وژلي او یوه اندازه وسلې او مهمات یې تر لاسه کړي دي. پوځ دا هم وايي، چې بېګا د شمالي وزیرستان په سپین وام کې وسلوالو پر سرحدي پوستو ډزې کړي او له امله یې یو پوځي وژل شوی دی.
پوځ دا نه دي ویلي، چې ځوابي برید کې وسلوالو ته هم زیان رسېدلی دی او که نه.
د ۲۰۲۳ کال وروستۍ ورځ د پاکستان پوځ ته د بلوچستان په اواران ضلع کې هم د پنځو وسلوالو د وژلو خبره کړې ده، خو د خپلې مرګ ژوبلې په هکله یې څه نه دي ویلي.
بل خوا په ټیلیګرام کې تحریک طالبان پاکستان ته نېږدې سرچینې وايي، چې په وزیرستان کې یې دوه پوځیان وژلي او یو ټپي دی.
د ايران د ګيلان ولايت د کار او ټولنيزو چارو د هماهنګۍ رييس وايي، چې د روان کال د چنګاښ د مياشتې له پيل څخه تر اوسه پورې په دغه ولايت کې ٥٠٧ بهرني کارکوونکي له قانوني اسنادو پرته نيول شوي دي. سيووش اقاجي وويل، چې ډېرى بنديان یې افغانان دي.
هغه زياته کړه، چې يواځې د جدي په ١٠مه په ګيلان کې ١٦ افغان کارکوونکي وپېژندل شول او ونيول شول.
د ایران د اسلامی جمهوریت خبری اژانس (ایرنا) راپور ورکړی، چې اوه نیول شوي کارګران د یکشنبې په ورځ په یوه رستورانت کې او نهه نور په یوه ودانۍ کې کار کاوه.
د ایرنا د خبر له مخې؛ ګیلان یو له هغو ښارونو څخه دی، چې د استوګنې له اجازې پرته د بهرنیو اتباعو کار پکې منع دی.
وروسته له هغې چې د طالبانو له خوا د کابل بشپړ کنټرول تر لاسه شو، ډېری افغانان د طالبانو د انتقام، پراخې بې وزلۍ او د بشري حقونو د پراخو سرغړونو له امله د خپل هېواد پرېښودو ته اړ شول.
د ایران د اسلامي جمهوریت د کار وزارت د روان کال د سپټمبر په میاشت کې اعلان وکړ، چې هغه مهاجرین چې د کار اجازه، د کار موقتي جواز یا موقتي کار کارت نه لري په دې هېواد کې د کار کولو اجازه نه لري.
د راپورونو له مخې؛ په ایران کې د افغانانو لپاره د ژوند او کار شرایط د هرې ورځې په تېرېدو سره ستونزمن کیږي.
په دې وروستیو کې د دغه هېواد د مهاجرت د ملي ادارې مشر ویلي؛ هغه کسان چې له رسمي اسنادو پرته مهاجرو ته سیم کارتونه، د اوسېدو ځای او ترانسپورټي خدمات وړاندې کوي، وبه پېژندل شي او مجازات به شي.
تحریک طالبان پاکستان په خپل کلني راپور کې لیکلي چې په ۲۰۲۳ عیسوي کال کې یې په پاکستان کې ټوټال ۸۸۱ بریدونه کړي دي. دا ډله زیاتوي، سږ کال یې ۲۱۹۳ پاکستاني نظاميانو ته مرګ ژوبله اړولې ده. دې ډلې په ۲۰۲۲ کال کې ۳۶۷ بریدونه کړی وو او سږني بریدونه یې له دوو برابرو ډېر دي.
د تحریک طالبان پاکستان د یکشنبې په ورځ د ۲۰۲۳ عیسوي کال کلنی راپور خپور کړی، چې افغانستان انټرنشنل ـ پښتو ته هم رسېدلی دی.
په دغه راپور کې ویل شوي چې دغې ډلې تېر کال یوازې ۵ ځانمرکي بریدونه کړي دی.
که څه هم تېر کال کې په پاکستان کې زیات ځانمرکي بریدونه شوي دي، خو دغې ډلې د هغو ځانمرکو بریدونو تعداد لیکلی چې دوی په غاړه اخیستي دي.
دغې ډلې زیات بریدونه په تېر اکست او سپټیمبر میاشتو کې کړي دي.
د پاکستان تحریک طالبان پاکستان په ۲۰۲۳ کال کې زیات بریدونه په شمالي او جنوبي وزیرستان کې کړي ډي، چې شمالي وزیرستان کې یې شمېر ۲۰۸ او جنوبي وزیرستان کې یې شمېر ۱۵۲ ته رسېږي.
د ټي ټي پي د کلني راپور په بنسټ دې ډلې په پیښور کې ۵۷ بریدونه کړي دی.
په ۲۰۲۳ کال کې پاکستاني طالبانو په پلوچستان کې شاوخوا ۴۰ بریدونه کړي دي.
دې ډلې په ۲۰۲۲ کال په پنجاب کې ۵ بریدونه کړي وو، خو سږکال دا بریدونه ۱۰ ته لوړ شوي دي.
د تحریک طالبان پاکستان پخوانی ویاند احسان الله احسان افغانستان انټرنشنل ـ پښتو ته وویل چې د ټي ټي پي په بریدونو کې له سل سلنه زیات زیاتوالی راغلی دی.
احسان وايي د ورځې په تېریدو سره په پاکستان کې د ټي ټي پي بریدونه مخ په زیاتېدو دي.
نوموړی زیاتوي د پاکستاني طالبانو په انساني قوه کې هم زیاتوالی راغلی دی او د پاکستاني مدرسو او کالجونو څخه زیات شمیر ځوانان دغه تحریک کې د کډون لپاره رامات شوي دي.
په همدې حال کې د پاکستان پوځ وايي، په ۲۰۲۳ میلادي کال کې یې په ټول هېواد ۱۸ زره ۷۳۶ پوځي عملیات کړي، چې پکې یې ۵۶۶ وسلوال وژلي دي.
د پاکستان د پوځ د شمیرو له مخې، په دغه موده کې، د ۲۶۰ افسرانو او سرتېرو په ګډون تر زرو ډیرو کسانو په ترهګریزو بریدونو کې خپل ژوند له لاسه ورکړی دی.
له دې وړاندې د پاکستان پوځ ویلي و، چې په افغانستان د طالبانو واک ته رسېدو سره ټي تي پي پرمختللې وسلې پیدا کړې دي او په دغه خاوره کې یې بریدونه څو برابره زیات کړي دي.
پاکستان زیاتوي د ټي ټي پي مشران په افغانستان کې ناست دي او له هغه ځایه بریدونه پلانوي.
خو نن د طالبانو دفاع وزیر ملا یعقوب په یوه خبري ناسته کې وویل چې چاته اجازه ورنکړي د افغانستان خاوره د بل هیواد پرضد وکاروي.
هغه دا هم وویل، چې په افغانستان کې تېر دوه نیم کاله ډیر بریدونه تاجکستاني او پاکستاني وګړو کړي دي.