د ازادو سیالیو افغان لوبغاړي جاوید بشارت د امریکا د نیواډا ایالت په لاس ویګاس ښار کې د خپل کاناډایي سیال ایمن ذهبي له لوري ماتې وخوړله او په (يو ایف سي) سازمان کې یې خپله لومړۍ ماتې تجربه کړه. دغه سیالۍ د ۶۱ کیلو وزن په کټګورۍ کې ترسره شوه.
د (یو ایف سي) سازمان په خپله ویبپاڼه لیکلي چې کاناډايي لوبغاړی ایمن ذهبي له دریو راونډونو لوبولو وروسته وتوانید چې جاوید بشارت د لوبڅارانو له لوري د ډیرو پواینټونو په ګټلو سره مات کړي.
دغه سیالۍ د امریکا د نیواډا ایالت په لاس ویګاس کې د (یو ایف سي، اپیکس) په کوربه توب ترسره شوه.
له دي ماتې وړاندې ښاغلي بشارت څوارلس لوبې کړې وې او ټولې یې ګټلې وې.
کاناډایي ایمن ذهبي د امریکا په لاس ویګاس ښار کې د جاوید بشارت په ماتولو سره ۱۱م بری خپل کړ.
جاوید بشارت په خپله فیسبوک پاڼه او انسټاگرام لیکي چې په دغې سیالۍ کې تر ډېر فشار لاندی و او ویې نشوای کولای چې بریالی شي، هغه له ټولو افغانانو او خپلو پلویانو بښنه غوښتې.
