د طالبانو یو ملاتړی او خواله رسنیو کې مشهور ملا عبدالحمید حماسي خپلو زدکوونکو ته وینا کې وايي، تر دیني علومو د عصري علومو اړتیا ډېره ده. نوموړی د یوه دیني عالم کتاب ته په اشاره وايي، عصري علوم د خوړو او دیني علوم د درملو حثیت لري چې د ناروغۍ په وخت ورته اړتیا ده.
عبدالحمید حماسي د دې خبرو له پیلولو مخکې فکر کوي چې شاګردان به یې مخالفت وکړي، نو ورته وايي، «زه تاسو ته علمي خبره کوم، علمي خبرې په خلکو بدې لګېږي، تاسو نه ملامتوم ځکه په داسې ټولنه کې مو وخت تېر کړی چې د دې علومو خلاف دي.»
نوموړی بیا د یوه دیني عالم علامه ېنطاوي له قوله زیاتوي چې شرعي علوم د درملو او علوم کونیه یا عصري علوم د خوړو حیثت لري، «خو اسلامي امت عصري علومو ته هیڅ پام نه کېږي او ټول عمر یې په دیني علومو کې تېر کړ.»
ملا حماسي زیاتوي که بې ضرورته درمل وخوړل شي، نو انسان مړ کوي.
هغه په دې باور دی چې په افغان ټولنه کې چې تر پنځو میلیونو ډېرو ملایانو ته اړتیا نشته او پاتې تر ۴۵ میلیونو وګړي باید عصري علوم، لکه صنعت، تجارت، کرنه، ټیکنالوجي او ساینس برخه کې کار وکړي، چې د خوړو حیثیت لري.
نوموړی وايي، له خبرې مې ناسم تعبیر مه کوئ، خو عذا ته څوک د حیثیت په سترګه نه ګوري او باید په دې برخه کې افغانستان په پښو ودرېږي او له سوالګرۍ خلاص شي.
د ملا حماسي دا خبرې په داسې مهال دي چې طالبانو په واکمنېدو سره تر شلو زرو ډېرې مدرسې جوړې کړې دي، خو پر دې ډله نیوکې دي چې د عصري علومو په برخه کې یې هم د مسلکي ښوونکو او استادانو پر ځای خپل کسان ګومارلي دي.
