د مزارشريف ځینې اوسېدونکو له افغانستان انټرنشنل سره په اړيکه کې په دغه ښار کې د ناامني او جنايي جرمونو پر زياتېدو اندېښنه وښوده. دوی وايي چې په وروستیو میاشتو کې د پخواني حکومت کارکوونکي او د بلخ د سوداګرو کورنۍ په دې ښار کې وژل کېږي او تښتول کېږي.
د بلخ ولایت اوسیدونکي طالبان او د دغې ډلې سیمه ییز چارواکي په دغه ولایت کې په «ترور او تښتونو» کې په لاس لرلو تورنوي.
د غبرګولي مياشتې په پيل کې وسله والو کسانو په بلخ کې د پخواني حکومت د عامې روغتيا پر مرستيال ډاکټر يوسف صميم او د هغه پر ورور قاضي محمد ياسين بريد وکړ.
په دغه برید کې د ډاکټر یوسف صمیم ورور قاضي محمد یاسین په ډزو ووژل شو او ښاغلی صمیم پخپله سخت ټپي شو. دغه پخوانی دولتي چارواکی دا مهال په کابل کې بستر دی.
د مزارشريف دغه اوسېدونکي وايي، لږ تر لږه څلور مرمۍ يې په خېټه او شا کې لګېدلې دي.
له دې برید څو ورځې وروسته طالبانو ادعا وکړه،چې د دې پېښې په تړاو یې درې تنه نیولي دي.
خو طالبانو د دغو کسانو د هويت په اړه نور جزیيات نه دي ورکړي.
له مزارشريف څخه سرچينو افغانستان انټرنشنل ته وويل، چې د دې پېښې دوه عاملين د بلخ د دريمې لوا د طالبانو استخباراتي مامورين وو.
دا په داسې حال کې ده، چې د روانې مياشتې په لومړيو کې هم د بلخ د يوه سوداګر ماشوم د ناپېژاندو وسله والو له خوا چې د طالبانو يونيفورم يې اغوستی و وتښتاوه.
دغه ماشوم د بلخ ولايت د مالچو د يوه سوداګر حاجي عبدالله زوی و، چې له دوو اوونيو وروسته د تښتوونکو له منګولو ازاد شو.
طالبانو ادعا کړې چې د دغه ماشوم د تښتولو په تور يې درې تنه نيولي دي، تر اوسه یې د دغو تښتوونکو د هويت او په دې ډله کې د هغوى د غړيتوب په اړه جزئيات نه دي ورکړي.
د بلخ یو شمېر اوسېدونکي وايي، چې د دغه ولایت د خلکو کورونه څو ځلې د طالبانو له لوري تالاشي شوي او په دغه ښار کې عام خلک وسلې ته لاس رسی نه لري.
د بلخ د دغو اوسېدونکو په خبره، طالبان پر دوی فشار راوړي چې د دغه ښار له سوداګرو پیسې واخلي.
