په دې وروستیو کې په کابل کې د ایران سفیر ویلي چې افغانستان د «مقاومت محور» دی او که اړتیا پیدا شي «استشهادي» ځواکونه به له افغانستانه غزې ته واستوي.
الاخبار ورځپاڼه په لبنان کې له حزب الله سره تړاو لري. د اسراییل پوځي راډیو د دغې ورځپاڼې په حواله راپور ورکړی چې د طالبانو مشرانو د ایران له چارواکو سره ژمنه کړې چې د حزب الله په ملاتړ به خپل جنګیالي لبنان ته واستوي چې د اسراییل په خلاف جګړه وکړي.
د غزې پر تړانګه د اسراییل له پوځي برید وروسته، د لبنان حزب الله له اسراییلي پوځ سره نښته وکړه او په دې وروستیو ورځو کې دغو نښتو زور اخیستی.
د لبنان حزب الله لکه حماس په سیمه کې د ایران له ملاتړه برخمنه وسله واله ډله ده.
په تېرو میاشتو کې د طالبانو او حماس ډلې مشرانو څو ځلې ناستې کړې او طالبانو د اسراییل پر ضد د فلسطیني وسله والې ډلې ملاتړ کړی دی.
د افغانستان په چارو کې د ایران ځانګړي استازي حسن کاظمي قمي د ۱۴۰۲سلواغې میاشت کې په یوه مرکه کې ویلي و چې افغانستان له غزې لرې دی، خو د «مقاومت محور» برخه ده.
ایران تر خپل ملاتړ لاندې او نورې ډلې چې په سیمه کې د لوېدیځې ټلوالې او اسراییل پر ضد جنګیږي د «مقاومت محور» نوموي.
هغه مهال د کاظمي قمي څرګندونې په افغانستان کې له پراخو غبرګونونو سره مخ شوې. المرصاد چې د طالبانو په استخباراتو پورې تړلې رسنۍ ده، د ۱۴۰۲ کال د سلواغې په ۱۹ د ایران سیمه ییزه تګلاره ننګولې او ویې ویل: «ولې ایران حزب الله ته دجګړې امر نه کوي؟ او یا خپله په سوریه کې د سنیانو د وژلو پر ځای له اسراییل سره جګړه نه کوي؟»
د حماس د سياسي دفتر غړي حسام بدران د ١٤٠٢ کال د کب په مياشت کې د طالبانو تر واک لاندې له باختر اژانس سره په مرکه کې وويل چې د افغانانو جهاد او په افغانستان کې د طالبانو بريا د حماس لپاره هیله بښوونکي وه.
طالبان او ایران نږدې اړیکې سره لري، ایراني او طالب چارواکو په تېرو دریو کلونو کې څو ځله کابل او تهران کې سره لیده کاته کړي دي.
