مجاهد: د نورو هېوادونو په پرتله له ایرانه زیاته تمه لرو، چې طالبان په رسمیت وپیژني
د طالبانو ویاند ذبیح الله مجاهد وايي؛ طالبان د نورو هېوادونو په پرتله د ایران له اسلامي جمهوریت څخه زیاته تمه لري، چې دغه ډله په رسمیت وپيژني. ښاغلي مجاهد یو ځل بیا د ایران له اسلامي جمهوریته غوښتي، چې د طالبانو رسمیت پېژندلو ته لومړیتوب ورکړي.
ذبیح الله مجاهد له تابناک خبري اژانس سره په مرکه کې چې د یکشنبې په ورځ (د جنګاښ۳مه) خپره شوه ویلي، له ایران څخه زموږ هیلې او تمې زیاتې دي. دایران اسلامی جمهوریت باید له نورو هېوادونو سره په رسمیت پیژندلو او اعلانولو کښې له مونږ سره زیات تعامل ولری او د رسمیت پیژندل باید د ایران داسلامی جمهوریت کارونو په لومړیتوب کې وي .
د طالبانو ویاند وايي، دغې ډلې د ایران له اسلامي جمهوریت سره په بېلابېلو برخو او همدارنګه په اقتصادي ډګر کې ښې همکارۍ لاس ته راوړي دي.
د ایران اسلامي جمهوریت د نورو هېوادونو په څېر طالبان په رسمیت نه پېژني، خو له دې ډلې سره اقتصادي او سیاسي اړیکې لري او په تهران کې یې د افغانستان سفارت طالبانو ته سپارلی دی.
ذبیح الله مجاهد د ایران له اسلامي جمهوریت سره د طالبانو د تعامل په تایدلولو سره وویل: مونږ دغه خبرې اترې ګټورې ګڼو او په دې برخه کښې زیات اعتماد لرو او د دغو اړیکو د لا پراختیا لپاره به هلې ځلې وکړو.
په تېرو دریو کلونو کې د ایران اسلامي جمهوریت له طالبانو سره د خپلو اړیکو سربیره په ځلونو ټینګار کړی، چې په افغانستان کې باید یو ټول شموله حکومت جوړ شي.
د افغانستان لپاره د ایران د اسلامي جمهوریت ځانګړي استازي حسن کاظمي قمي د شنبې په ورځ (د غبرګولي۱۹مه) په تهران کې د افغانستان لپاره د تماس ډلې له غونډې وروسته وویل، که په سیاسي ډګر کې وویل شي، چې یو حکومت د بېلابېلو اقشارو په شتون سره په افغانستان کې به یو ټولکډونه حکومت له "صادق خلکو" جوړ شي، دا د افغانستان په چارو کې د مداخلې په مانا ده.
خو ذبیح الله مجاهد له تابناک خبري اژانس سره په مرکه کې د ښاغلي قمي دغه غوښتنه د طالبانو په چارو کې د لاس وهنې په معنا ګڼلې ده.
هغه وويل: "د حکومت جوړېدل، د دولتي نظام بڼه، ټول شموله او نه شموليت په افغانانو پورې اړه لري او په بل هېواد پورې اړه نه لري."
ذبیح الله مجاهد په تهران کې د افغانستان لپاره د تماس ډلې په غونډه کې د طالبانو د نه ګډون په اړه وویل، چې طالبان په ځینو غونډو کې د ګډون په اړه خپله پالیسي لري: «غونډې باید د اقتصادي او سیاسي وضعیت پر بنسټ، پراخې او اغېزمنې وي. "