د افغان ښځو په چارو کې د امریکا ځانګړی استازی رینا امیري وايي، چې په وروستیو اوونیو کې یې د ښځو او بشري حقونو د فعالانو پراخې اندېښنې او وړاندیزونه اورېدلې، له ملګرو ملتونو او ۲۰ څخه ډیرو هیوادونو سره یې شریکې کړي دي.
رینا امیري پر اېکس ټولنیزې شبکې خپور کړي پیغام کې ویلي، چې دغه اندیښنې په د دوحې په درېیمه غونډه کې هم شریکې کړي.
مېرمن امیري د شنبې په ورځ په ورځ ویلي، چې د دوحې په غونډه کې او تر هغه وروسته به په دغو غونډو کې د ښځو او د مدني ټولنې د فعالانو د ګډون لپاره د هر اړخیز چوکاټ د جوړولو لپاره خپلو مشورو ته دوام ورکړي..
اغلې امیري د ښځو ځينې اندېښنو ته هم اشاره کړې ده. هغې ويلي، چې د ښځو او د بشري حقونو د فعالانو يوه غوښتنه دا ده چې د افغانستان د راتلونکي په اړه پرېکړه کې بايد د ښځو په ګډون بېلابېل افغانان ګډون وکړي، څو د افغانانو ملاتړ له دغو پریکړو سره وي.
د هغې په وينا، د بشري حقونو د دغو فعالانو بله غوښتنه دا ده، چې د ښځو او نجونو حقونو ته بايد لومړيتوب ورکړل شي. هغې ټینګار کړی چې افغانانو او په ځانګړې توګه ښځو ته باید په خبرو اترو کې د ګډون حق ورکړل شي څو له ځانه دفاع وکړي.
د ښځو او بشري حقونو د مدافع شبکو بله غوښتنه دا ده چې نړیواله ټولنه باید پر طالبانو فشار ته دوام ورکړي چې ژر تر ژره هغه فرمانونه لغوه کړي چې تعلیم، کار او په ټولنه کې د ښځو او نجونو لاسرسی محدودوي.
هغه وايي ، چې په افغانستان کې تلپاتې سوله او ثبات د ښځو له شتون پرته نه شي راتلای.
