په هند کې د مذهبي مراسمو پر مهال د ګڼې ګوڼې له امله تر سلو ډېر کسان وژل شوي دي
هندي رسنیو ویلي، چې د دغه هېواد په شمال کې د مذهبي مراسمو پر مهال د ګڼې ګوڼې له امله ۱۰۷ کسان وژل شوي دي. د هند روغتیايي چارواکو ویلي چې د پېښې ډېری قربانیان ښځې دي.
هندي رسنیو ویلي، چې د دغه هېواد په شمال کې د مذهبي مراسمو پر مهال د ګڼې ګوڼې له امله ۱۰۷ کسان وژل شوي دي. د هند روغتیايي چارواکو ویلي چې د پېښې ډېری قربانیان ښځې دي.
دا پېښه د سې شنبې په ورځ د جنګاښ په ۱۲ مه د اترپردېش ایالت په هاتراس ولسوالۍ کې د هندوانو د مذهبي مراسمو کې شوې ده.
د هند امنیتي چارواکي وايي، د پېښې د لا زیاتو څېړنو لپاره یې یوه تحقیقاتي کمېټه ټاکلې ده.
تر اوسه د پېښې لامل نه دی څرګند، خو یو شمېر عیني شاهدانو رسنیو ته ویلي، چې پېښه د مذهبي مراسمو له پای ته رسېدو وروسته هغه مهال شوې چې ګډونوالو غوښتل په بېړه له سیمې ووځي.
له پېښې وروسته د هند ولسمشر دروپادي مرمو او لومړي وزیر نریندرا مودي د قربانیانو له کورنیو سره خپله خواخوږي څرګنده کړه.
په مذهبي مراسمو کې د خلکو ګڼه ګوڼه او په پایله کې مرګ ژوبله په هند کې بې سارې نه ده. په ۲۰۱۳ کال کې په مدیا پردیش کې په یوه مذهبي مراسمو کې د خلکو ګڼې ګوڼې ۱۱۵ کسان ووژل.
