په کابل کې د چین سفیر وايي، هېواد یې د ساختماني او او انرژۍ د توکو په ګډون د چین بازار ته له تعرفې پرته د طالبانو لاسرسی برابروي. جاو شينګ پرون له ملا کبیر سره تر لیدنې وروسته په خپل اېکس کې لیکلي: "چین به د سل سلنې تعرفې پرځای افغانستان ته صفر فیصده تعرفه وړاندې کړي."
له هغه وروسته چې طالبانو په ۱۴۰۰ کال کې د افغانستان واک تر لاسه کړ، چین له طالبانو سره د اړیکو د پراختیا په لټه کې دی، خو د نورو هېوادونو په څېر یې هم د دغې ډلې د حکومت له رسمیت پېژندلو ډډه کړې ده.
د طالبانو تر واک لاندې افغانستان د چینایي کمپنیو ته د کانونو ځیني زیرمې په واک کې ورکړې دي.
په همدې حال کې، د افغانستان د لیتیم، مسو او اوسپنې د زېرمو پلورل به له طالبانو سره مرسته وکړي، چې خپل ضعیف اقتصاد پیاوړي او د اړتیا وړ عاید چمتو کړي.
په افغانستان کې د چین سفیر جاو شينګ د پنجشنبې په ورځ ناوخته په خپله رسمي خواله رسنۍ کې د طالبانو له مرستیال عبدالکبیر سره د لیدنې له انځور سره لیکلي: "چین به له افغانستان سره د ۱۰۰ سلنې تعرفې په ځای صفر سلنه تعرفه وړاندې کړي."
د چین د ګمرکونو د معلوماتو له مخې، افغانستان تېر کال چین ته د ۶۴ میلیونه ډالرو په ارزښت توکي صادر کړي، چې نږدې ۹۰ سلنه یې جلغوزي دي.
طالبانو ویلي دي د بهرنیو پانګوالو د راجلبولو په لټه کې دي، چې د افغانستان د اقتصاد په پرمختګ کې مرسته وکړي او د هېواد له معدني شتمنیو ګټه پورته کړي.
د معلوماتو له مخې په کابل کې د چین سفیر تېر سپټمبر کې له ګومارل کېدو راهیسې د کانونو، تېلو، سوداګرۍ او سیمه ییزو اړیکو له مسوولو طالبانو مسوولینو سره د لیدنو انځورونه خپروي.
څو چینایي شرکتونه په افغانستان کې فعالیت کوي، چې په هغو کې د چین متالورژیکال شرکت، چې په لوګر کې د مسو د یوه لوی کان د اېستلو په اړه یې د طالبانو له حکومت سره خبرې کړې دي.
د طالبانو ارګ اېکس پانې لیکلي، چې مولوي کبیر دا څرګندونې د پنجشنبې په ورځ (د لړم درېیمه) د طالبانود کډوالو او راستنېدونکو چارو وزارت له خوا یوې جوړې شوې غونډې ته وکړې.
مولوي کبیر وویل: « په افغانستان کې د بهرنیو اشغال او جګړې ګاونډیو او نورو هېوادونو ته د ګڼ شمېر افغانانو د کډوالۍ لامل شوې دي.»
مولوي کبیر وایي، چې طالبان هڅه کوي د لویو پروژو په پیلولو سره، افغانان نور د فقر له امله کډوالۍ ته مجبوره نه شي او په بهر کې مېشت افغانان خپل هېواد ته راستانه شي.
مولوي کبیر دا څرګندونې په داسې حال کې کوي، چې هره ورځ لسګونه افغانان پر ناقانونه لارو له افغانستانه وځي. د راپورونو له مخې د دغې ډلې له واکمنېدو وروسته اته میلیونه افغانان له هېواده وتلي دي.
تېره اونۍ، د راپورونو له مخې ایراني پوځیانو د افغانستان او پاکستان په پوله کې له ۲۶۰ څخه دیر افغانان په ډزو ویشتي چې په اړه یې په کور د ننه او بهر کې توند غبرګونونه راپاریدلي دي.
د طالبانو د کډوالو او بېرته راستنېدونکو چارو وزارت وايي، چې شاوخوا ۸۰ زره افغانان له پاکستانه، ۱۰ زره له ترکیې او پنځه لکه او ۵۰ زره کډوال له ایرانه په زور او خپله خوښه راستانه شوي دي.
