طالبانو په غزني کې یوه ښځه او یو نارینه د «نامشروع» اړیکو په تور په دورو وهلي دي
د طالبانو ستره محکمه وايي، چې د غزني ولایت په مقر ولسوالۍ کې یې یوه ښځه او نارینه د «نامشروع» اړیکو په تور د خلکو د سترګو په وړاندې په دورو وهلي دي.
د طالبانو ستره محکمه وايي، چې د غزني ولایت په مقر ولسوالۍ کې یې یوه ښځه او نارینه د «نامشروع» اړیکو په تور د خلکو د سترګو په وړاندې په دورو وهلي دي.
د طالبانو له لوري په عام محضر کې خلکو ته د بدني سزاګانو ورکولو په دوام د یادې ډلې سترې محکمې د دوشنبې په ورځ د (لړم۲۱مه) د یوې خبرپاڼې په خپرولو سره ویلي، چې تېره ورځ یې د غزني ولایت د مقر ولسوالۍ د ابتدایه محکمې د پرېکړې له مخې یوې ښځې او یو نارینه ته د «نامشروع» اړیکو په تور په عام محضر کې سزا ورکړې.
د طالبانو سترې محکمې په خپرپاڼې کې لیکلي، چې ښځه یې ۳۹ دورې وهلې او پنځه کاله بند سزا یې ورکړې ده.
همدارنګه یو نارینه یې هم د یوه کال بند سزا تر څنګ ۳۹ دورې وهلی دی.
طالبانو په خبرپاڼه کې د تورنې ښځې او تورن کس هویت په اړه څه نه دي ویلي، خو وايي، چې پر یادو کسانو یې په عام محضر کې د سزا ورکولو حکم د دغې ډلې د سترې محکمې تر تایید وروسته پلی کړی.
که څه هم د بشري حقونو نړۍوال سازمانونه او ګڼ هېوادونه د طالبانو له لوري په عام محضر کې د بدني سزاګانو ورکولو ته سخت غبرګونونه ښودلي؛ خو طالبان په نږدې دوو ورځو کې په بېلابېلو ولایتونو کې په عام محضر کې پر خلکو د بدني سزاګانو په پلې کولو سره وايي، چې دوی پر خلکو شریعت پلی کوي.
