د طالبانو تر کنټرول لاندې د هوا پوهنې ادارې د چهارشنبې په ورځ (د لړم ۲۳مه) پر اېکس پاڼې لیکلي، چې د سالنګونو په ګډون د هېواد په ۱۹ ولایتونو کې د سختو بارانونو, تالندې او د سېلابونو د راوتلو اټکل شته.
د طالبانو د کنټرول لاندې د هوا پوهنې اداره وایي، چې دغه وړاندوینه د سالنګونو په ګډون په کاپیسا، پنجشیر، پروان، لغمان، ننگرهار، کونړ، نورستان، بغلان، سمنګان، بلخ، تخار، سرپل، بدخشان، میدان وردک، غزني، هرات، بامیان، غور او دایکندي ولایتونو کې شوې ده.
دغې ادارې له هېوادوالو غوښتي، چې په ولایتونو کې له پېښو سره د مبارزې ولایتي کمېټو لخوا ورکړل شویو لارښوونو سره سم عمل وکړي او سیندونو ته دې له نږدې کېدو څخه په جدي ډول ډډه وکړي.
تېره ورځ (پرون) هم دغې ادارې په بدخشان، نورستان، پروان، پنجشېر، تخار، بغلان، کندوز، سمنګان، بلخ، بامیان، سرپل، جوزجان، فاریاب، دایکندي، غور، بادغیس او هرات ولایتونو کې د شړکنده باران، تالندې برېښنا، تېزو سېلیو، خاورو دوړو او سېلابونو د راوتو اټکل کړی و.
یاده اداره په داسې حال کې دغه وړاندوینه کوي، چې د هېواد په بېلابیلو برخو کې په وروستیو کلونو کې د سختو سېلابونو د راوتلو له امله سلګونه کسانو ته مرګژوبله واوښته او زرګونه جریبه کرنیزې ځمکې یې له منځه یوړې.
د ژمي په را نږدې کېدو سره یو ځل بیا د هغو سېلاب ځپلو سیمو اوسېدونکي اندېښمن دي، چې تر اوسه هم سرپناه نه لري او له ناوړه اقتصادي وضعیت سره هم مخ دي.
