د طالبانو د کورنيو چارو وزير سراج حقاني په پکتيا کې د خپل تره، خلیل حقاني د جنازې په مراسمو کې وویل، چې له چا سره شخصي دښنمني نه لري ، خو د مغز، جنګ او مقابلې چل دې خلک له دوی زده کړي. هغه ويلي، د «اسلامي نظام» په راتګ يې د مسلمانانو د قوت هیله درلوده خو ځينې بیا هم غلامي کوي.
د طالبانو د کورنيو چارو وزير سراج الدین حقاني د پنجشنبې په ورځ د پکتيا په ګرده څېړۍ ولسوالۍ کې د دې ډلې د کډوالو چارو د وزير خلیل حقاني د جنازې په مراسمو کې وويل، چې دوی ته دغه غم د «الله د دین په خاطر» رسېدلی دی.
نوموړي وویل، چې خلیل حقاني د مسلمانانو نه بلکي د «کفارو» دښمن و او د هغه وژل کېدل د قاتلانو لپاره هيڅ د افتخار خبره نه ده.
هغه زياته کړې: « زه په دې خفه یم چې دوی باید په دې کار خپل ځانونه نه واي رنګ بدي کړي، خلیل حقاني خو د کفارو دښمن و، تاسې په دې باندي څه غټه کامیابي وکړه؟ کاشکې تاسې د کفر خلاف یو عمل کړی واي چی د مسلمانانو شملې لوړې شوې وای.»
سراج حقاني په خپلو خبرو کې ويلي، چې له چا سره شخصي عقده او دښمني نه لري: «الله ج انتقام اخستونکی دی، موږ له چا سره شخصي عقده او شخصي دښمني نه لرو، خلک دې د مغز، جنګ او مقابلې چل له موږ نه زده کړي.»
د طالبانو د کورنيو چارو د وزير په خبره، د «تېر شل کلن جهاد» پر مهال یې سخت تکلیفونه ليدلي خو حوصله يې لا هم له لاسه نه ده ورکړې.
هغه زياتوي: « اسلامی نظام چې افغانستان کې راغلی زموږ ارزو وه، چې د مسلمانو لپاره به یو قوت وګرځي، نن کفارو ته داسي غلامي کيږي.»
نوموړي د بريد په اړه څه ونه ویل او نه يې هم مشخص د چا نوم ياد کړ، خو یادونه یې وکړه، چې دې خلکو حضرت علي او معاویه هم پرېنښودل، چې هدف یې ظاهرا داعش، یا ددوی په اصطلاح خوارج دي.
د طالبانو د کډوالو او راستنېدونکو چارو وزیر خلیل الرحمان حقاني پرون چار شنبه په یوه ځانمرګي بريد کې ووژل شو.
د دغه بريد مسوولیت داعش ډلې په غاړه اخستی.
د خلیل الرحمان حقاني د جنازې مراسم نن د افغانستان پر وخت دوه بجې په پکتیا ولایت کې ترسره شول.
دغه ځانمرګي برید، چې داعش یې مسوولیت منلی، په داسې وخت کې شوی چې دواړې خواوې د خپلو اړیکو د ښه کولو په درشل کې دي.
طالبان په پرله پسې ډول پاکستان تورنوي چې په بلوچستان او نورو سیمو کې یې داعش وسله والې ډلې ته پټنځایونه ور کړي او په کندهار او یو شمېر نورو سیمو کې د ځانمرګو بریدونو عاملان له پاکستان نه ورغلي او هلته یې بریدونه ترسره کړي.
د طالبانو پلویانو د چارشنبې په ورځ د خلیل حقاني له وژل کېدو وروسته د پاکستان پوځ ته د یوه نږدې اېکس حساب سکرین شاټونه خپاره کړل، چې د یوه برید وړاندیونه یې کړې وه. د یادې ډلې د غړو په باور، ځانمرګی بریدګر پاکستان ورلیږلی او ددې ډلې جګپوړی مشر یې، چې تر نورو ډېر نرم هدف و، وژلی دی.
داعش وسله والې ډلې پرون ددغه برید مسوولیت پرغاړه واخست او ویې ویل چې ددوی جنګیالی له امنیتي خنډونو تېر شوی و او وزیر ته په تمه و، چې ویې وژني.
د ډیپلوماټیکو هڅو کمزوري کېدل
په تېرو اونیو کې، پاکستان او طالبانو د خپلو ترینګلو اړیکو د ښه کولو لپاره خپله لېوالتیا څرګنده کړې وه. د لوړ پوړو ډیپلوماټیکو غونډو لړۍ، چې د پاکستان د بهرنیو چارو وزیر اسحاق ډار او په پاکستان کې د طالبانو د سفیر او دغه راز کابل کې د پاکستان د سفیر او د طالبانو ددفاع وزیر ترمنځ شوې وه، دا ښودله، چې دواړې خواوې د خپلو ګډو امنیتي اندېښنو د حل لپاره لاس په کار شوې دي.
خو د خلیل حقاني ترور، چې د پاکستان او طالبانو ترمنځ په خبرو کې یو مهم کس و، دا هڅې له خطر سره مخامخ کړې دي.
خلیل حقاني له تحریک طالبان پاکستان (TTP) سره د اسلام اباد په خبرو اترو کې د منځګړیتوب لپاره کلیدي رول لوبولی و او په همدغه ترڅ کی یې د پاکستان له مختلفو اړخونو سره ښې اړیکې درلودې. هغه په قبایلي سیمو کې له قومي مشرانو، د پاکستاني طالبانو د مختلفو ډلو له مشرانو او عامو خلکو سره شل کلنې او ۴۰ کلنې اړیکې درلودې.
اوس که ثابته شي چې د وزیر په وژلو پسې ځانمرګی بریدګر له پاکستان نه ورغلی و، د طالبانو او پاکستان ترمنځ ترینګلتیاوې لا زیاتېدای شي.
حقاني شبکه چې د پاکستان نیابتي ډله کڼل کیږي، په دې وروستیو کې له څو اړخونو تر فشار لاندې ده.
یو خوا ته پاکستان له دې ډلې نه د پاکستاني طالبانو د کنټرولولو تمه لري، چې په دې برخه کې له اوږدو خبرو اترو سره سره، پاتې راغلې ده. حقانیانو په تېرو دریو میاشتو کې خپل ګڼ شمېر جنګیالي له دې امله بندیان کړي چې د پاکستاني طالبانو په لیکو کې جنګېدل او یا یې دې ډلې ته جنګیالي جذبول، خو له دې هڅو سره سره، د پاکستاني طالبانو په بریدونو کې نه یوازې دا، چې کموالی راغلی، بلکې لا ډېر شوي دي.
بل پلو، یاده شبکه د خپل مشر ملا هبت الله اخوندزاده تر فشار لاندې ده، چې له لویدیز سره د اړیکو پرځای دده اطاعت او پالیسیو ته غاړه کیږدي.
حقاني په مکرر ډول د خپل مشر پالیسۍ نقد کړې دي او داسې رپوټونه دي، چې د کابل او کندهار ترمنځ اړیکې روغې نه دي.
په ورته وخت کې داعش یو بل ستر سرخوږ دی، چې دا ډله ورسره مخامخ ده. د طالبانو مشر په لویه پکتیا کې ګڼ چارواکي او د امنیتي پوستو ځواکونه له دې امله بدل کړي، چې د حقاني پر جنګیالیو له پاکستان سره د نږدې اړیکو له امله ډېر باور نه لري. په دې منځ کې داعش او ددې ډلې ملاتړي له دې اختلافاتو نه ګټه پورته کوي او د خلیل حقاني په څېر کسانو د وژلو له لارې کولای شي، دا اختلافات نور هم ژور کړي.
یو ماتېدونکی راتلونکی
اقتصادي همکاري د وروستیو خبرو یوه مهمه برخه وه. تېره اونۍ، د خیبر پښتونخوا د سوداګرۍ او صنعت ځانګړي مرستیال عبد الکریم په پېښور کې د طالبانو له یوه ډیپلوماتیک پلاوي سره د سوداګریزو اړیکو د پیاوړتیا په اړه خبرې کړې وې. د دې هڅو هدف دا و چې د افغانستان جغرافیایي اهمیت د پاکستان د اقتصادي رغونې او سیمهییزو پروژو لپاره وکارول شي.
خو اقتصادي همکاري په هغه وخت کې شونې ده چې د دواړو هېوادونو اړیکې ثبات ولري.
د امنیتي شخړو زیاتوالی دغه اړیکې له جدي خطر سره مخامخ کولی شي.
د خلیل حقاني وژل کېدای شي د پاکستان او طالبانو په اړیکو کې یو مهم بدلون راولي. د اسلام اباد لپاره، دغه پېښه هغه شراکت ته زیان رسوي چې ملکي حکومت یې د ګډو ګټو لپاره مهم بولي.