د ایران د بهرنیو چارو وزارت ویاند اسماعیل بقایي پر اېکس پاڼه لیکلي، چې د دغه هېواد د بهرنیو چارو وزیر سید عباس عراقچي کابل ته رسېدلی. نوموړي په خپله پاڼه لیکلي، چې «موږ کابل ته رسېدلي یو.» د طالبانو ویاند په رسمي ډول د عراقچي د سفر په اړه لا څه نه دي ویلي.
اسماعیل بقایي د خپل ایکس په یادښت کې لیکلي، دغه سفر د دواړو هېوادونو ترمنځ د اړیکو پراختیا او پیاوړتیا لپاره یو مهم ګام کېدای شي؛ ترڅو د دواړو هېوادونو لپاره متقابلې ګټې خوندي شي.
ایراني رسنیو کابل ته د عراقچي د سفر په اړه لیکلي، چې د ایران بهرنیو چارو وزیر داسې مهال کابل ته ځي، چې له دې وړاندې په سیمه کې د داعش ترهګرې ډلې ګواښونه موجود دي.
رسنیو ویلي، چې عراقچي به کابل ته د خپل سفر په جریان کې د طالبانو له لوړپوړو چارواکو سره د داعش د ګواښونو او په سیمه کې د امنیت په اړه سلا مشورې وکړي او له طالبانو به وغواړي چې دغې موضوع ته جدي پام وکړي.
ایراني رسنیو لیکلي، د داعش له خوا کابل ته د عراقچي د سفر په وړاندې ګواښونه داسې مهال شوي، چې طالبانو تر دې وړاندې افغانستان ته د ایران د بهرنیو چارو وزیر د سفر لپاره د بشپړ امنیت ډاډ ورکولو ژمنه کړې و.
د ایران تر ټولو لویه اندېښنه د افغانستان له پولې د داعش ګواښ دی چې تر دې وړاندې یې هم له طالب چارواکو سره په پټو او ښکاره ناستو کې څرګنده کړې ده.
طالبانو په تېرو درېیو کلونو کې په ځلونو ویلي، چې داعش ډله یې په افغانستان کې له منځه وړې او له افغان خاورې به هیچاته امنیتي ګواښونه نه پیښیږي.
خو د ایران د بهرنیو چارو وزیر کابل پرته له کوم رسمي پرټوکول او تشریفاتو رسیدلی او یوازې ټيټ پوړي طالبان یې د کابل په هوايي ډګر کې هرکلي ته ورغلي وو.
دا لا نه ده روښانه چې عراقچي به په کابل کې له کومو طالب چارواکو سره ناستې ولري، خو ځینو داخلي رسینو د طالبانو بهرنیو چارو وزارت د ویاند له قوله ویلي، چې عراقچي به په کابل کې له امیرخان متقي سره د دواړه هیوادو په مسایلو خبرې وکړي.
د طالبانو د بهرنیو چارو وزارت یوه ټيټ پوړي چارواکي ذاکر جلالي په ایکس پاڼه لیکلي چې د ایران بهرنیو چارو وزیر به کابل کې د دواړو هیوادونو د اړیکو پر پیاوړتیا او اړیکو خبرې وکړي خو دا یې نه دي ویلي، چې د هغه خبرې به له چا سره کیږي.
ایراني رسنیو ویلي، د دغه سفر یو له مهمو موخو د هلمند د حقابې موضوع ده چې په تیرو څه باندې درېیو کلونو کې د ایران او طالبانو تر منځ یو له کړکیچنو موضوعاتو څخه ده.
عراقچي له دې وړاندې په سوریه کې د وسله والو ډلو د خوځښتونو پرمهال دمشق ته سفر کړی و، او د دمشق په مرکز کې په یوه رستورانت کې د هغه انځورونه د خبرونو سرټکی شو.
ایران په وار وار ویلي چې طالبان د حقابي په مسله کې پر خپلې هوکړې نه دي درېدلي او د پخوانۍ هوکړې له مخې دوی ته د اوبو حق نه ورکړل کیږي.
خو ورته مهال دواړه هیوادونه ښې سوداګریزې اړیکي لري او ښايي تر راتلونکو دوو کلونو یې سوداګریز مبادلات ۱۰ میلیارده ډالرو ته ورسیږي.
