د پاکستان د خلکو ګوند مشر بلاول بوټو زرداري پر پاکستان د هند برید غندلی او ویلي یې دي، چې دا تېری به هيڅکله له پامه ونه غورځوي. هغه زياته کړې، چې پاکستان به هند ته د دغه تېري غاښ ماتونکی ځواب ورکړي.
پر پاکسان د هند تر برید وروسته د خلکو د ګوند مشر بلاول بوټو زرداري ویلي، چې هند د پاکستان په خاوره کې ملکي اهداف په نښه کړي او په لوړ جرات به ورته عمل تر سره کړي.
نوموړي زياته کړې: «د هند له خوا د ملکي سیمو په نښه کول بزدلانه، بې دلیله بریدونه او جنګي تېری دی او د ملکي کسانو په نښه کول زور نه بلکې وحشت دی.»
بلاول بوټو ټينګار کړی، چې د ولس په ملاتړ به پاکستاني وسله وال ځواکونه د هند د تېري ځواب ورکړي او د هند دغه تېری به ځپل کېږي.
هغه ویلي: « موږ به هېڅکله خپله خپلواکي تر پښو لاندي نه کړو، پاکستان یو موټی ولاړ او بشپړ تیار دی.»
دا په داسې حال کې ده، چې هند شاوخوا درې ساعته مخکې د پاکستان په پنځو سیمو توغندیز بریدونه وکړل.
د پاکستاني چاروکو په خبره، چې په دې بریدونه کې ملکي وګړي او جوماتونه په نښه شوي او په پایله کې یې ۸ کسان وژل شوي او ۳۳ نور ټپيان دي.
