د ترکیې او پاکستان د بهرنیو چارو وزیرانو پر ټیلیفون د سیمې په امنیتي وضعیت خبرې وکړې

پر پاکسان د هند تر برید وروسته د خلکو د ګوند مشر بلاول بوټو زرداري ویلي، چې هند د پاکستان په خاوره کې ملکي اهداف په نښه کړي او په لوړ جرات به ورته عمل تر سره کړي.

نوموړي زياته کړې: «د هند له خوا د ملکي سیمو په نښه کول بزدلانه، بې دلیله بریدونه او جنګي تېری دی او د ملکي کسانو په نښه کول زور نه بلکې وحشت دی.»

بلاول بوټو ټينګار کړی، چې د ولس په ملاتړ به پاکستاني وسله وال ځواکونه د هند د تېري ځواب ورکړي او د هند دغه تېری به ځپل کېږي.

هغه ویلي: « موږ به هېڅکله خپله خپلواکي تر پښو لاندي نه کړو، پاکستان یو موټی ولاړ او بشپړ تیار دی.»

دا په داسې حال کې ده، چې هند شاوخوا درې ساعته مخکې د پاکستان په پنځو سیمو توغندیز بریدونه وکړل.

د پاکستاني چاروکو په خبره، چې په دې بریدونه کې ملکي وګړي او جوماتونه په نښه شوي او په پایله کې یې ۸ کسان وژل شوي او ۳۳ نور ټپيان دي.

هغې د چهارشنبې سهار پر خپلې اېکس‌پاڼې لیکلي: «د پنجاب خاوره د شهیدانو او غازیانو د وینو ساتونکې ده او د هغو بې‌ګناه خلکو وینه چې نن شپه پر دې خاوره تویه شوې، مسوولیت یې زمونږ پر غاړه ده.»

مریم نواز همداراز زیاته کړې، دولتي ادارو ته لارښوونه شوې چې د بېړني وضعیت په بڼه سملاسي اقدامات وکړي او د خلکو بېړنۍ اړتیاوې پوره کړي.

همداراز هغې په یوه بل بیان کې نن (چهارشنبه) په ټول پنجاب ایالت کې د خلکو د خوندي‌توب په موخه عمومي رخصتي اعلان کړې ده.

دا پرېکړه د زده‌کونکو او ښوونکو پر وړاندې د هر ډول اټکلي ګواښ د مخنیوي په موخه شوې ده.

د نوازشریف لور او د پنجاب ایالت سروزیره مریم نواز دا څرګندونې داسې مهال کوي، چې شاوخوا درې ساعته مخکې د هند د دفاع وزارت په یوه بیان کې ومنله چې ځواکونو یې د پاکستان په خاوره او د دغه هېواد تر کنټرول لاندې کشمیر کې د ترهګریزو فعالیتونو اړوند ۹ مرکزونه په نښه کړي دي.

د پاکستان د بهرنیو چارو وزارت د هند د بریدونو په ځواب کې ویلي، چې د هند مشران غواړي د ترهګرۍ په پلمه خپل درواغجن داستان پر مخ بوځي.

د یاد وزارت په خبره: «د ملګرو ملتونو د ۵۱مې مادې او نړۍوال قانون له مخې د همدې برید د ځواب ورکولو حق لري؛ خو مناسب ځای او وخت ته ګوري.»

په اعلامیه کې ویل شوي، چې د هند په برید کې ملکي کسان وژل شوي او سوداګریز هوايي ترافیک ته جدي ګواښ جوړ شوی.

په اعلامیه کې راغلي، چې د هند دا بې پروا اقدام دوه اټومي وسلې لرونکي هېوادونه جدي شخړې ته درولي او اوسنۍ وضعیت به لا هم بدل شي.

وزارت ویلي، چې وسله وال ځواکونه او ولس یې د هند د تېري په وړاندي یو موټي دي او له خپلې خاوري به دفاع کوي.

د پاکستان د پوځ ویاند اعلان وکړ، چې پر پاکستان د هند د برید له امله ۳ کسان وژل شوي او ۱۲ نور ټپيان دي.

سرچینو دا هم ویلي، چې پاکستان له خپلو هوایي ډګرونو ټولې الوتنې وځنډولې او د پاکستان پر هوايي حریم هم ټول پروازونه لغوه شوي دي.

د دواړو هېوادونو پوځيان د تیار سي په حال کې دي.

پر پاکستان د هند د بريد ویډوګاني هم افغانستان انټرنشنل ته رسېدلي او په کې ښکاري، چې یو شمېر کسان په ټپي حالت کې روغتون ته وړل شوي.

د پاکستان پوځ د سې‌شنبې په ورځ اعلان وکړ چې «هند څو شېبې مخکې د پاکستان په خاوره کې پر درېیو نقطو توغندیز برید وکړ.»

د پاکستان پوځ یوه ویاند د دغه هېواد رسنیو ته زیاته کړه، چې دوی به د هند برید ته ځواب ورکړي.

عیني شاهدانو رویټرز خبري اژانس ته وویل، چې د پاکستان تر ولکې لاندې د کشمیر د مظفراباد ښار په شاوخوا غرونو کې د څو چاودنو غږونه واورېدل شول.

د عیني شاهدانو په وینا، له چاودنو وروسته د دغه ښار برېښنا هم پرې شوه.

دا لا تر اوسه روښانه نه ده، چې د دې چاودنو لامل څه دی.