د دیني عالم مولوي بشیراحمد حنفي د کورنۍ یوه غړي افغانستان انټرنشنل - پښټو ته منلې، چې نوموړی له مصر نه تر راستنېدو یوه ورځ وروسته د طالبانو استخباراتو نیولی. د حنفي د کورنۍ غړي د نوم د نه ښودلو په شرط وویل، هغه له ۸ ورځو راهیسې د هلمند د مرکز په لښکرګاه زندان کې دی.
سرچینې وویل: «بشیراحمد حنفي له مصر نه تر راستنېدو یوه ورځ وروسته د طالبانو استخباراتو له ځانه سره یووړ او اته شپې کېږي چې هلته بندي دی.»
د سرچینې په خبره، طالبانو د نوموړي دوسیه دا مهال د دغې ډلې اړوند محکمې ته لېږلې او هغه له تېرو ۸ ورځو راهیسې له محکمې سره له کوم جرم پرته بندي دی.
سرچینې وویل :«موږ نه پوهېږو چې ولې یې بندي کړی، خو دا د هغه دویم ځل دی چې طالبان یې بندي کوي او له ځانه سره یې وړي. هغه اوس دومره ستړی شوی چې حیران دی څه وکړي؟»
ویل کېږي، چې بشیراحمد حنفي له بېبېسي سره تر یوې مرکې وروسته د طالبانو استخباراتو بندي کړی، خو د کورنۍ غړي یې بیا وایي چې تر اوسه د هغه د نیولکېدو په تړاو معلومات نهلري.
د معلوماتو لهمخې، دیني عالم مولوي بشیراحمد حنفي د مصر په الازهر پوهنتون کې په دینې برخه کې د دوکتورا زدهکړې کوي.
د کورنۍ غړي یې وویل :«موږ هیلهمن یو چې هغه له زندانه خوشې شي، ځکه راتلونکو دوو اونیو کې په الازهر پوهنتون کې ازموینه لري او که دا ازموینه ور نه کړي، نو کلونه کلونه خواري به یې عبث شي.»
نوموړی چې پر نړۍوالو رسنیو د علم او دین په اړه بحثونه کوي، تل یې د طالبانو د ټولنیزو رسنیو یو شمېر فعالان په دې اړه ننګولي، چې ګواکې د ښځینه و د تعلیم په اړه ولې خپل غږ نه پورته کوي.
حنفي د هلمند ولایت په لښکرګاه ښار کې ژوند کوي او هلته یې د ماشومانو د دینې زدهکړې په برخه کې یوه دینې مدرسه هم جوړه کړې ده.
هغه همداراز په لښکرګاه کې خپل خوړنځای هم لري، چې له تېر یوه کال راهیسې د هغه نوم سره ډېر شهرت ترلاسه کړی دی.
د یادونې ده، چې دیني عالم مولوي بشیراحمد حنفي وخت ناوخت په ټلوېزیوني مرکو کې د نجونو پر مخ د زدهکړو د بندیز په تړاو طالبان ننګولي او له دغې ډلې یې په ځلونو د هغوی لپاره د پوهنتونونو او ښوونځیو د خلاصون غوښتنه کړې ده.
