سعودي عربستان ته د امریکا د ولسمشر ډونالډ ټرمپ تر رسېدو وروسته د هرکلي په مراسمو کې نوموړي عربي قهوه و نه څښله. ټرمپ د دې هېواد د ځانګړي او دودیزې مېلمستیا پر مهال چې پکې قهوه وړاندې کېږي، یوازې د قهوې پیاله په لاس کې ونیوله، خو هغه یې ونه څښله.
نیویارک ټایمز د یوه راپور په خپرولو سره لیکلي: «ټرمپ قهوه نه خوښوي او رژیمي څښاکو ته ترجیح ورکوي.»
په دغه مراسمو کې د ټرمپ له ګډون وروسته داسې ویډیوګانې خپرې شوې، چې پکې ټرمپ خپله قهوه و نه څښله، یوازې یې پیاله په لاس کې نیولې وه.له هغه وخته چې ټرمپ د ملک خالد هوایي ډګر ته ورسېد تر هغه پورې چې په شاهي ماڼۍ کې رسمي لیدنه وشوه، دوه ځلې له هغه څخه په عربي چای او قهوې سره هرکلی وشو.دا په داسې حال کې ده، چې په ۲۰۱۷ کال کې بیا ټرمپ سعودي عربستان ته په سفر کې عربي قهوه څښلې وه.د سعودي عربستان د سمبولیک کلتور یوه مهمه برخه هغه مېلمستیا ده، چې پکې عربي کافي په دودیز لوښي کې چې "دله" نومېږي جوړېږي او په وړو بې لاستو پیالو کې وړاندې کېږي.په دې دود کې که مېلمه ونه غواړي دویمه پیاله وڅښي، نو پیاله په نرمه توګه ښوروي څو خدمتګار ته نښه ورکړي او دا هماغه حرکت و چې بن سلمان له قهوه څښلو وروسته په هوايي ډګر کې وکړ.
