د طالبانو د کانونو او پټرولیم وزیر هدایت الله بدري وایي، سره له دې چې د افغانستان او ایران پر ضد «دښمنان پراخ تبلیغات کوي»، خو اوس د دواړو هیوادونو ترمنځ اقتصادي او د کانونو په برخه کې یو «استثنایي او طلایي فرصت» رامنځته شوی دی.
د ایرنا اژانس د رپوټ له مخې، بدري دغه څرګندونې د دوشنبې په ورځ د ایران د کاني موادو د پروسس د څېړونکو په دویم نړیوال سمپوزیم کې وکړې، چې دا مهال د ایران د البرز ولایت په کوربه توب روان دی.
بدري وویل، « اوس مهال په افغانستان کې امنیت او ثبات حاکم دی او د ایران پانګوال او اقتصادي سکتور کولای شي په ډاډه زړه هلته پانګونه وکړي».
هغه زیاته کړه، چې افغانستان له بېلابېلو طبیعي زیرمو ډک دی او دا د ایرانی پانګوالو لپاره یو غوره فرصت دی.
د طالبانو د کانونو وزیر وویل، چې د ایران دولتي او خصوصي دواړه سکتورونه کولای شي د افغانستان په اقتصادي پرمختګ کې فعاله ونډه ولري.
هغه پر دې هم ټینګار وکړ، چې د «افغانستان او ایران د خلکو دښمنان هڅه کوي د دواړو هېوادونو وضعیت منفي انځور کړي»، خو اوسنی وضعیت د ګډو اقتصادي همکاریو لپاره یو طلایي چانس دی چې باید له لاسه ور نه کړل شي.
بدري همداراز یادونه وکړه، چې د افغانستان او ایران ترمنځ ژور فرهنګي مشترکات شته، چې دا کولی شي د دوه اړخیزو همکاریو د پیاوړتیا لامل شي.
یاد شوی درې ورځنی سمپوزیم د ایران د البرز ولایت په کاوش صنعتي ښارګوټي کې ترسره کېږي، چې موخه یې د کاني موادو د پروسس په برخه کې د نړیوالو څېړونکو نظریات شریکول او د همکاریو پراخول دي.
