ذبیح الله مجاهد: د ریاست الوزرا سیاسي معاونیت لغوه شوی دی

د طالبانو ویاند ذبیح الله مجاهد ویلي، د دوی د حکومت د تنقیصاتو په لړۍ کې هغه ادارې چې لګښتونه یې زیات او ګټه یې کمه وه، د ریاست الوزرا سیاست معاونیت هم شامل دی چې لغوه شوی دی.

مجاهد د افاق خبري اژانس سره د خبرو پر مهال تایید کړه، چې د طالبانو د ریاست الوزرا سیاسي پوسټ لغوه شوی دی.

نوموړي ویلي:« په دې ورستیو کې د حکومتدارۍ په بېلابېلو برخو کې تنقیص راغلی او هغه غیر اړیني ادارې چې مصارف یې ډېر او ګټه یې کمه وه، نو طبعاً په دې لړۍ کې د ریاست الوزرا سیاسي معاونیت هم شامل دی، خو په بهرنیو چارو وزارت کې کوم څه نه دې کم شوي او ښه مخته روان دی.»

افغانستان انټرنشنل ـ پښتو شاوخوا یوه میاشت وړاندې د طالبانو د دوو باخبرو سرچینو له قوله راپور ورکړی و، چې د دې ډلې مشر ملا هبت الله په شفاهي امر د ریاست الوزرا سیاسي معاونیت لغوه شوی دی.

د طالبانو د کډوالو د پخواني وزیر خلیل الرحمن حقاني تر وژل کېدو وروسته مولوي عبدالکبیر د ریاست اولوزرا د سیاسي معاونیت له پوسټ څخه د کډوالو د وزیر په توګه تبدیل شو.

پر همدغه مهال د طالبانو د ریاست الوزرا مقام د دفتر عمومي ریاست د غوايي په ۹مه په خپله اېکسپاڼه لیکلي وو، چې د طالبانو د مشر ملا هبت الله د حکم پر اساس د ارګ ۲۲۲ بستونه تنقیص شوي، خو د ریاست الوزرا د سیاسي معاونیت پوسټ د لغوه کېدو په اړه یې څه نه و ویلي.