امریکا له ایران سره د اټومي تړون د خبرو تر سیوري لاندې نوي بندیزونه اعلان کړل
د امریکا متحده ایالتونو د ایران پر ضد تازه بندیزونه لګولي، دا په داسې حال کې چې د ایران او امریکا تر منځ د اټومي تړون د بیا پیل خبرو وضعیت لا هم ناڅرګند دی.
د متحده ایالاتو خزانې وزارت په یوه خبرپاڼه کې ویلي چې دا بندیزونه پر ۱۰ افرادو او ۲۷ شرکتونو لګول شوي دي.
یاد بندیزونه نه یوازې د ایران شرکتونه نښه کوي، بلکې ځینې شرکتونه چې په متحده عربي اماراتو او هانګ کانګ کې فعالیت لري هم ترې اغېزمن شوي دي.
دغه بندیزونه داسې مهال لګول کېږي چې د ولسمشر ډونالډ ټرمپ اداره هڅه کوي له تهران سره نوی اټومي تړون ترلاسه کړي.