د متحده ایالاتو ولسمشر ډونالډ ټرمپ وايي چې د بایډن حکومت د سرحدونو پرانستې پالیسي د امریکا د کرنې، هوټلدارۍ او تفریحي صنعتونو ته ستر زیان اړولی دی، او مجرمانو ته یې د کار زمینه برابره کړې.
ټرمپ، نن دسوشل ټروت له لارې په یوه تازه پیغام کې لیکلي:"زموږ ستر کروندګر او د هوټل او تفریح سکتور خلک وايي چې زموږ د پیاوړې کډوالۍ پالیسي هغوی ته له اوږدې مودې راهیسې وفادار کارکوونکي له منځه وړي، او دا دندې اوس نږدې ناشوني دي چې بېرته ډکې شي."
ولسمشر ټرمپ زیاته کړې چې د بایډن د "ډېر احمقانه سرحدي سیاست" له امله هېواد ته مجرمان راغلي، چې همدا اوس په دغو دندو کې د کار لپاره غوښتنې وړاندې کوي، او دا وضعیت د منلو وړ نه دی.
ټرمپ ټینګار کړی: "موږ باید خپل کروندګر وساتو، خو مجرمان باید له امریکا وایستل شي. بدلونونه راروان دي!" –
ټرمپ د خپلو کډوالۍ ضد دریځونو له امله د خپلې واکمنۍ په دویم پړاو کې هم د پام وړ ملاتړ او مخالفت دواړه راجلب کړي. د نوموړي دغه څرګندونې ښيي چې سپینه ماڼۍ به په نږدې راتلونکي کې د کډوالۍ او سرحدي پالیسیو په برخه کې نوې سختې پرېکړې اعلان کړي.
