په افغانستان کې د نشهيي توکو له امله د روږدو کسانو شمېر نږدې څلور میلیونو ته رسېدلی، چې د طالبانو د کورنیو چارو وزارت دا یوه جدي ټولنیزه ستونزه بولي؛ خو د نشه یي توکو کاروباریان وایي د دې ډلې مشران پخپله د کوکنارو په کاروبار کې ښکېل دي.
په هېواد کې د روږدو کسانو ډېرېدل یوه اندېښمنوونکې او پراخه ټولنیزه ستونزه ده، چې د روغتیا، اقتصاد او ټولنیز ثبات لپاره ستر ګواښ بلل کېږي، پر همدې مهال د طالبانو د کورنیو چارو وزارت مرستیال مولوي عبدالرحمن قاسمي وایي چې دا مهال په افغانستان کې نږدې څلور میلیونه وګړي په نشه یي توکو روږدي دي.
مولوي قاسمي، په کابل کې د نشه یي توکو پر ضد د مبارزې نړیوالې ورځې په مناسبت جوړې شوې غونډې ته په خپله وینا کې وویل، چې په ټول هېواد کې یې په مخدره توکو د روږدو درملنې لپاره ۱۶ حمایوي مرکزونه جوړ کړي، چې دا مهال ټول ۱۲ زره ۶۷۳ تنه روږدي په کې تر درملنې لاندې دي.
هغه پر نړیوالو بنسټونو غږ وکړ چې له نشه يي توکو سره د مبارزې په لاره کې سیاسي چلند و نه کړي؛ بلکې په نشه يي توکو د روږدو کسانو د درملنې او هغوی ته د کاري فرصتونو برابرولو په برخه کې دې له افغانستان سره همکاري وکړي.
طالبان په داسې حال کې د نشه یي توکو له ناوړه کارونې او قاچاق سره د مبارزې نړیواله ورځ لمانځي، چې د نشه یي توکو کاروباریان ادعا کوي چې د طالبانو له خوا د نشهيي توکو پر ضد مبارزه درواغجنه ده او پخپله د دې ډلې مشران د کوکنارو په کر، پروسس او قاچاق کې ښکېل دي.
د نشه یي توکو ځینو قاچاق وړونکو د افغانستان انټرنشنل پښتو سره په خبرو کې ویلي چې طالب مشران، له سیمهيیزو قوماندانانو تر وزیرانو پورې، د نشهيي توکو په پراخ کاروبار کې ښکیل دي.
قاچاقبران وايي چې د هلمند، کندهار، روزګان، ننګرهار او بدخشان ولایتونو په ګډون، په یو شمېر سیمو کې هر کال تر درې فصله کوکنار کرل کېږي. د دوی په وینا، طالب چارواکي نه یوازې دا کرکیله ننداره کوي، بلکې د دې پروسې مشري هم کوي.
