د طالبانو تر کنټرول لاندې د افغانستان بانک اعلان وکړ چې یو پلاوی د دغه بانک د رییس نوراحمد اغا په مشرۍ مراکش ته د اسلامي مالي خدماتو په غونډه کې د ګډون لپاره تللی. د افغانستان بانک په وینا، دا غونډه پر اسلامي مالي سکتور، بانکي روڼتیا او مالي ثبات تمرکز کوي.
د طالبانو تر کنټرول لاندې د افغانستان بانک د یکشنبې په ورځ، د چنګاښ پر اتمه په یوه خبرپاڼه کې د دغه پلاوي سفر د اسلامي بانکدارۍ په برخه کې د نړیوالو همکاریو د پراختیا او له مهمو مالي بنسټونو سره د اړیکو د جوړولو لپاره مهم وباله.
د طالبانو په خبرپاڼه کې راغلي چې په دې غونډه کې به د هیوادونو د مرکزي بانکونو رییسان او نړیوال مالي چارواکي ګډون وکړي.
ویل شوي چې د مراکش په رباط ښار کې د اسلامي مالي خدماتوپه غونډه کې، چارواکي د اسلامي بانکدارۍ مهمې تجربې له یو بل سره شریکوي.
طالبانو هیله څرګنده کړې چې د دې پلاوي سفر به د دې ډلې او نورو هیوادونو ترمنځ د اسلامي مالي او بانکدارۍ همکاریو یو نوی فصل پرانیزي.
