د اوکراین هوایي ځواک تایید کړې چې د یوې اېف ۱۶جنګي الوتکې پیلوټ یې د روسیې د تېرې شپې په برید کې وژل شوی او الوتکه هم له منځه تللې ده. زیلینسکي وايي، مسکو یواځې دا اونۍ ۱۱۴ توغندي، ۱۲۷۰ ډرونونه او نږدې ۱۱۰۰بمونه کارولي.
د اوکراین ولسمشر ولادیمیر زیلینسکي د دغه برید په غبرګون کې له لویدیزو متحدینو د لا زیاتو هوایي دفاعي سیستمونو غوښتنه کړې ده. برید لږ تر لږه اووه تنه ژوبل کړي او ګڼ شمېر کورونه، تعلیمي او صنعتي تاسیسات یې زیانمن کړي دي.
اوکراین وایي، دا درېیمه اېف ۱۶جنګي الوتکه ده چې له جګړې راپه دېخوا یې له لاسه ورکوي.
که څه هم اوکراین تر اوسه دا نه ده افشا کړې چې څو اېف ۱۶الوتکې لري، خو دا الوتکې د کیېف د هوایي دفاع مهمه برخه جوړوي.
زیلینسکي پر خپل اېکس ولیکل، « د روسیې چې تر څو د پراخو بریدونو توان رسیږي، نه به دریږي. یواځې دا اونۍ له ۱۱۴ زیات توغندي، تر ۱۲۷۰ ډرونونه او نږدې ۱۱۰۰بمونه کارول شوي دي».
د اوکرایني پوځ په وینا، یوازې تېره شپه ۴۷۷ ډرونونه او ۶۰ ډوله توغندي پر اوکراین وتوغول شول، چې له دې ډلې ۲۱۱ ډرونونه او ۳۸ توغندي د دفاعي ځواکونو له خوا له منځه یووړل شول.
د برید غږونه په لویف، پولتاوا، میکولایف، دنیپروپتروفسک، چرکاسي او ایوانوفرانکیفسک ولایتونو کې اوریدل شوي دي.
په چرکاسي کې شپږ تنه ژوبل شوي، چې یو یې ماشوم دی. همدارنګه درې پوړیزې ودانۍ او یو کالج هم زیانمن شوي دي.
اوکرایني هوایي ځواک ویلي چې وژل شوي پیلوټ خپلې ټولې وسلې کارولې او اووه هدفونه یې را غورځولي، خو د وروستي هدف ویشتلو پرمهال یې الوتکه زیانمنه شوه. پیلوټ هڅه وکړه چې الوتکه له ښارګوټي لرې بوځي، خو له الوتکې د وتلو وخت یې ونه موند.
