د طالبانو د کورنیو چارو وزارت ویاند عبدالمتین قانع اعلان وکړ، چې د پولیسو د ۳۰۰ بستریز تخصصي دورې د زده کونکو د فراغت مراسم د دې ډلې د کورنیو چارو وزیر په حضور کې ترسره شول. په خپرو شویو انځورونو کې، د فارغانو په منځ کې هیڅ ښځه نه لیدل کیږي.
د طالبانو د کورنیو چارو وزیر سراج الدین حقاني په مراسمو کې وویل:«پخوا د افغانستان په روغتیايي سیستم کې بې باوري وه، خو اوس د پرمختللو تجهیزاتو، متخصصینو او په ۳۰۰ بستریز روغتون کې د عمومي روغتیا سکتور په پیاوړتیا سره، دا باور بیرته راګرځیدلی دی.»
حقاني زیاته کړه: چې «د روغتیا پر مرکزونو او طبي خدماتو د خلکو باور ورځ په ورځ زیاتیږي.»
د طالبانو د ۳۰۰ بستریز روغتون مشر صدیق الله بدر وویل چې ۲۱ کسانو په دې تخصصي دوره کې تخصصي روزنه ترلاسه کړې او اوس چمتو دي چې په دغه روغتون کې خلکو ته خدمات وړاندې کړي.
د طالبانو د کورنیو چارو وزارت له خوا په خپره شوې خبرپاڼه کې ویل شوي چې « سراج الدین حقاني د ۳۰۰ بستریز روغتون د روغتیا سکتور ستونزې واورېدې او ډاډ یې ورکړ چې د ظرفیت لوړولو لپاره به اړینې اسانتیاوې برابرې شي».
طالبانو د ۱۴۰۳ کال د لیندۍ په میاشت کې په رسمي ډول په نرسنګ، قابله ګۍ او نورو روغتیایی علومو کې د ښځو روزنه بنده کړه.
د طالبانو د مشر هبت الله اخوندزاده د حکم له مخې، د کابل طبي انستیتونو او روغتیايي ادارو کې به د قابله ګۍ، نرسنګ، لابراتوار او غاښونو طب او نورو برخو کې هیڅ ښځه او نجونې ونه مني.
په دغه حکم سره اټکل کیږي، چې شاوخوا ۳۵ زره نجونې په سلګونو دولتي او خصوصي ادارو کې د زده کړو له دوام څخه منع شوې دي.
یونېسف د روان کال په مارچ کې خبرداری ورکړ، چې که په طبي برخو کې د ښځو پر زده کړې بندیز دوام ومومي، نو سږ کال به له ۵۰۰۰ څخه زیاتې میندې او نوي زیږېدلي ماشومان خپل ژوند له لاسه ورکړي.
