د پاکستان د پوځ مشر وايي د وزیرستان د ځانمرګي برید غچ به واخلي
د پاکستان په شمالي وزیرستان کې د پوځیانو له خونړي برید وروسته د پوځ مشر عاصم منیر خېبرپښتونخوا ته ولاړ او ټينګار یې وکړ، چې له عاملینو به غچ واخلي. هغه وویل، چې ترهګر به بېدرېغه تعقیب کړي او «په سیمه کې به د ترهګرۍ اصلي سرچينه» افشا کړي.
دغه موټر بم بريد د پاکستاني ځواکونو پر کاروان شوی، چې۱۳ سرتېري وژل شوي او همداراز یو شمېر ښځې او ماشومان هم ټپیان شوي دي.
د پاکستان پوځ هند تورن کړی، چې په دې برید کې لاس لري؛ خو نوي ډیلي دا تور رد کړی دی.
پاکستاني رسنیو راپور ورکړی، چې د برید مسوولیت یوې داسې ډلې پر غاړه اخیستی چې له تحریک طالبان پاکستان سره تړاو لري او د حافظ ګل بهادر تر مشرۍ لاندې فعالیت کوي.
د پاکستان اکسپرېس ټریبیون ورځپاڼې د راپور له مخې، د حافظ ګل بهادر ډله د افغانستان په ختیځ خوست ولایت کې له خوندي پناهځایونو برخمنه ده.
خوست هغه ولایت دی، چې د طالبانو د کورنیو چارو وزیر سراجالدین حقاني اصلي مرکز ګڼل کېږي.
ویل کېږي، چې هغه له پاکستان او تحریک طالبان پاکستان سره نږدې اړیکې لري.
عاصم منیر د دې برید د قربانیانو د جنازې په مراسمو کې وویل، ټول هغه کسان چې ترهګرۍ ته زمینه برابروي، ملاتړ یې کوي یا په کې ښکېل دي، بېوقفې به تعقیب او عدالت ته به وسپارل شي.
هغه تحریک طالبان پاکستان پر دې تورن کړ، چې له هند سره اړیکې لري او ټینګار یې وکړ: «د پاکستان خلک د ترهګرۍ د هر ډول بڼې د بشپړې له منځه وړو لپاره یو موټی دي او تر هغه به په خپله اراده ټینګ وي، چې دا ګواښ له هېواده په بشپړ ډول ختم شوی نه وي.»
هغه د خپل هېواد خلکو ته ډاډ هم ورکړ، چې د هر بې ګناه پاکستاني د وینې غچ به واخیستل شي او د پاکستان د داخلي ثبات د کمزوري کولو لپاره به د چټک او پرېکنده ځواب سره مخ شي.