د تېر جمهوري نظام د ولسمشر مرستیال امرالله صالح وايي، په افغانستان کې د عزیزي ګروپ د مشر میرویس عزیزي پانګونې تخیلي دي او له هېوادوالو یې غوښتي، چې له عزیزي بانک څخه خپلې پیسې وباسي څو د رسوایۍ او سقوط پر مهال پیسې یې خوندي پاتې شي.
امرالله صالح په خپله اېکس پاڼه کې لیکلي، میرویس عزیزي له ۲۰۲۴ کال راهیسې په افغانستان کې د ۲۱ میلیارده ډالرو په ارزښت د پانګونو ژمنه کړې، خو لا تر اوسه هېچا هم د هغه د ۲۰ میلیونه ډالرو پانګونه نه ده لیدلې او په وینا یې د پانګونې په نوم هېڅ هم نشته.
نوموړي ادعا کړې، که جمهوري نظام پر خپل ځای وای، نو اوس به میرویس عزیزي په زندان کې وای. صالح همداراز ویلي، چې زلمي خلیلزاد د جمهوري نظام د رانسکورولو لپاره ډېر شخصي او رسمي پټ دلیلونه درلودل او یو یې هم د عزیزي ژغورل وو او په وینا یې که چېرې په ريښتیني توګه د عزیزي بانک تفتیش وشي، نو دغه بانک به له افلاس سره مخ شي او په فساد کې به یې د خلیلزاد نقش هم په ډاګه شي.
امرالله صالح همداراز ادعا کړې، چې په تېر نظام کې یې له میرویس عزیزي سره کتلي او په وینا، یې میرویس عزیزي هڅه کوله چې پرې لګېدلي جرمي تورونه پر مدني مواردو بدل کړي، خو هغه د میرویس عزیزي د جرمونو په اړه نور جزییات نه دي ورکړي او په دې اړه یې هم وضاحت نه دی ورکړی، چې په هغه وخت کې چې نوموړی د ولسمشر لومړی مرستیال وو او له داسې یوه کس چې د ده په باور مجرم وو، ولې لیدلي او همداراز ولې یې قانون پرې نه دی عملي کړی.
د ویلو ده، چې د عزیزي ګروپ مشر میرویس عزیزي پرون (شنبه د زمري په ۱۱مه) په کابل کې د ۱۰مېلیارده ډالرو په ارزښت د انرژۍ د تولید یوه هوکړه لاسلیک کړه. هغه د دغې هوکړې د لاسلیکولو پرمهال ویلي، چې د یادې پروژې په پلي کېدو به افغانستان د انرژۍ د تولید له اړخه ځان بسیاینې ته ورسېږي.
په ترلاسه شوې ویډیو کې ښکاري، چې د طالبانو د ننګرهار د خارجه چارو ګوښه شوی رییس مولوي فضل الهادي په تختخواب کې پروت دی او په یوه ویډیويي کال کې پر خپله لوڅه کړې تناسلي اله لاسونه وهي.
له دې ويډیو څخه د طالبانو ځینې مشران خبر شوي او د نوموړي د ګوښه کولو پرېکړه یې کړې ده.
د طالبانو د ننګرهار ولایت مقام د رسنیو دفتر اعلان وکړ، چې د ولایت دفتر رییس شاهد نوراني له لوري د ننګرهار د خارجه چارو نوی رییس مولوي جان محمد انقلابي مسوولینو ته ور وپېژندل شو.
په دغو مراسمو کې ګوښه شوي رییس مولوي فضل الهادي احمد هم حضور درلود.
د طالبانو د ننګرهار ولایت مقام په اعلامیه کې لیکل شوي، چې شاهد نوراني د پخواني ګوښه شوي رییس مولوي فضل الهادي احمد د کړنو ستاینه کړې ده.
خو افغانستان انټرنشنل ته د طالبانو سرچینې وايي، چې نوموړی د اداري معمول له مخې له دندې نه دی ګوښه شوی، بلکې د ویډیو له خپرېدو وروسته پرېکړه وشوه، چې نوموړی له ننګرهار څخه تبدیل او په پکتیا کې د برېښنا رییس وټاکل شي.
دوه کاله وړاندې افغانستان انټرنشنل یوه ویډیو ترلاسه کړه، چې د کابل د برېښنا شرکت رییس ملا احمد له خپل ساتونکي سره په بستره کې د څملاستلو په حالت کې ښيي.
د دې ویډیو له خپرېدو درې ورځې وروسته د زمري پر ۳۱مه طالبانو ملا احمد اخوند کندهار ته وغوښت، خو وروسته د نوموړي دا تګ «کورنۍ ستونزه» وبلل شوه.
د طالبانو نظامي محکمې تېره میاشت ملا احمد ته "له خپل ساتونکي سره د څملاستو" له قضیې برائت ورکړ.
طالبان له تېرو څو کلونو راهیسې د افغانستان په مختلفو ولایتونو کې خلک د مختلفو جرمونو په تېره د غلا، زنا او لواطت په تور په دُرو وهي، خو د دې ډلې مختلف چارواکي د کابل او کندهار په ګډون په مختلفو ولایتونو کې په ورته تورونو نیول شوي مګر تر اوسه یوه ته هم سزا نه ده ور کړل شوې.
د طالبانو منتقدان دا په دې ډله کې له شرعي احکامو نه د ځان او نورو لپاره دوه ګونی تفسیر او چلند ګڼي.