د پښتونخوا په پېښور ښار کې یو افغان امام په ډزو وژل شوی
په پښتونخوا کې د پولیسو سرچینو ویلي د جمعه په ورځ په پیښور ښار کې د رضا خان مریم زۍ جومات افغان امام د نامعلومو وسله والو لخوا په ډزو وژل شوی دی.
په پښتونخوا کې د پولیسو سرچینو ویلي د جمعه په ورځ په پیښور ښار کې د رضا خان مریم زۍ جومات افغان امام د نامعلومو وسله والو لخوا په ډزو وژل شوی دی.
د پیښور پولیسو ویلي ادم خان، چې یو افغان امام او د پکتیا ولایت اوسیدونکی دی، په موټرسایکل کور ته د ستنېدو پرمهال پرې برید شوې او پر ځای وژل شوی دی.
د ځایي چارواکو په وینا، پولیسو د پېښې له ځایه مهم شواهد راټول کړي او پلټنې یې پیل کړې دي.
مریمزي هغه سیمه ده، چې د پېښور په ښار کې موقعیت لري او ګڼ شمېر افغان کډوال پکې ژوند کوي.
د خيبر پښتونخوا اعلی وزير علي امين ګنډاپور وايي، چې د طالبانو سره د خبرو اترو د پيل لپاره يې وړانديز د پاکستان حکومت منلی دی. هغه ټينګار کړی، چې د افغان کډوالو بېرته ستنېدل بايد په باعزته توګه ترسره شي او د امنيتي ستونزو دايمي حل يوازې د طالبانو سره د خبرو له لارې ممکن دی.
د اعلی وزیر علی امین ګنډاپور د دفتر له خوا په خپره شوې خبرپاڼه کې راغلي، چې دا خبره نوموړي په پېښور کې د «جنګ او ملي امنيت دوره» ناستې له ګډونوالو سره د یوې د ليدنې پر مهال کړې.
ګنډاپور په دې ناسته کې وويل، چې په افغانستان کې بې ثباتي د خيبر پښتونخوا پر امنيت منفي اغېز کړی او د ترهګرۍ پر وړاندې جګړه کې د پاکستان امنيتي ځواکونو او ولس لويې قربانيانې ورکړي دي.
ښاغلي ګنډاپور ټينګار وکړ، چې امنيتي ستونزې او ترهګري يوازې د طالبانو سره د خبرو له لارې حل کېدای شي او دا د خوښۍ خبره ده چې د هغه دا وړانديز د پاکستان حکومت منلی دی.
هغه زياته کړه، پاکستان له ډېر وخت راهيسې د افغان کډوالو کوربه توب کړی او د حکومت اوسنۍ پاليسي دا ده، چې دوی بېرته خپل هېواد ته ولاړ شي؛ خو دا بهير بايد د انساني کرامت سره سم ترسره شي.
د پاکستان د بهرنیو چارو وزیر اسحاق ډار د جمعې په ورځ وویل چې هغه وړاندیزونه، چې د متحده ایالاتو ولسمشر ډونالډ ټرمپ د غزې جګړې د پای ته رسولو لپاره اعلان کړي، د مسلمانو هېوادونو له خوا د ټرمپ لپاره وړاندې شوې مسودې سره سمون نه لري.
د ډار په وینا، دغو هېوادونو په سپټمبر میاشت کې ټرمپ ته وړاندیز کړی و چې اسراییل باید له غزې څخه بشپړ ووځي، خو د ټرمپ پلان یوازې د اسراییل جزوي شاتګ وړاندیز کوي ترڅو د فلسطیني حماس وسلهوالو لهخوا نیول شوي پاتې یرغمل کسان خوشې شي.
ډار د پارلمان د غړو په وړاندې وویل: «ما څرګنده کړې چې دا ۲۰وړاندېزونه چې ټرمپ یاد کړي، زموږ له وړاندیز سره سمون نه لري، ځینې بدلونونه پکې شوي دي، په هغه مسوده کې چې موږ وړاندې کړې وه.»
ټرمپ د دوشنبې په ورځ د اسراییل او حماس ترمنځ د جګړې د پای لپاره ۲۰وړاندېزونه په ډاګه کړل، چې له مخې به یې ټول ژوندي او مړه یرغمل کسان د اوربند وروسته په ۷۲ ساعتونو کې خوشې شي.
دغه پلان د راتلونکي «نوې غزې» د بیا رغونې وړاندیز هم کوي.
په پلان کې یې ډېری جزییات د خبرو اترو لپاره پرېښي دي او د حماس د منلو پورې تړلي.
ډار وویل، د سعودي عربستان، متحده عربي اماراتو، قطر، مصر، اردن، ترکیې، اندونیزیا او پاکستان مشرانو د غزې د وضعیت په اړه له ټرمپ سره لیدلي وو.
دغه هېوادونو له ټرمپ ژمنه ترلاسه کړې چې د اشغال شوې لویدیځې غاړې الحاق ته به اجازه ورنه کړي.
د پاکستان د کابینې د اقتصادي همغږۍ کمېټې د پنجشنبې په ورځ یوه نوې مسوده منظوره کړه، چې له مخې به یې افغانستان، ایران او روسیې سره د مال پر مال سوداګرۍ تګلاره بدله او اصلاح شي.
په دې غونډه کې چې د ماليې او عوایدو فدرالي وزیر محمد اورنګزیب یې مشري کوله، د سوداګرۍ وزارت ته وړاندیز وکړ چې د افغانستان په ګډون د ګاونډیو هېوادونو سره د سوداګرۍ موجوده چوکاټ ته بدلون ورکړل شي، څو سوداګریزې اړیکې لا اسانه او عملي شي.
له دې پرکړې وروسته به د افغانستان، پاکستان، ایران او روسیه د پیسو پر ځای سوداګري د توکو په تبادله تر سره کیږي.
دغې پرېکړې ته د پاکستان اقتصادي کارپوهان د پام وړ ارزښت ورکوي. د دوی په باور، د مال پر مال سوداګري به د یادو هېوادونو ترمنځ د هغو ستونزو هوارولو کې مرسته وکړي، چې د بانکي محدودیتونو او د پیسو د لېږد د ستونزو له امله رامنځته شوي دي.
په اسلاماباد کې یوشمېر افغانان شکایت کوي، چې له کوم دلیل پرته یې د پاکستان حکومت په پرلهپسې ډول د ویزو غوښتنلیکونه ردوي. دوی له افغانستان انټرنشنل سره په خبرو کې وايي، چې په وروستیو میاشتو کې یې په وار، وار د ویزو غوښتنه کړې؛ خو له اوږد انتظار وروسته یې د ویزو غوښتنه رد شوې ده.
صفي الله چې له څه باندې درېیو کلونو راهیسې په پاکستان کې اوسېږي وايي، څلور میاشتې وړاندې یې د ویزې موده ختمه شوې؛ خو لاهم نهدی بریالی شوی، چې د خپلې ویزې موده وغځوي.
نوموړی وايي، تېره ورځ یې د درېیم ځل لپاره د خپلې ویزې د رد ایمېل ترلاسه کړ او په ایمېل کې د ویزې د ردېدو لامل په اړه ورته هېڅ نه و ویل شوي.
هغه وایي:« له ډېرو هڅو سره، سره بیاهم دوی ویزې نه راکوي. موږ دلته له بېلابېلو ستونزو سره مخامخ یو. په کوم ښارګوټي کې چې اوسېږو، دلته نور افغانان هم شته. پولیس پوهېږي، چې موږ ویزې نهلرو؛ نو وخت ناوخت راځي او ډېر مو ځوروي.»
په پاکستان کې د مېشتو یو شمېر افغانانو په خبره؛ ډېری ردېدونکې ویزې روغتیایي او سیاحتي وې. په ورته وخت کې په پاکستان کې مېشته بله افغان کډواله ثریا هم د ورته ستونزې په شریکولو سره وايي، چې روغتیایي ویزه یې له کوم دلیل پرته رد شوې ده.
هغه وایي: «د ویزو لپاره درخواست ورکوو او دوی یې له کوم دلیل پرته ردوي. په هرځل موږ شاوخوا د درېیو کسانو لپاره ۲۵ زره کلدارې ورکوو؛ خو اوس مو پریکړه کړې، چې نور غوښتنلیک نه جمع کوو؛ ځکه هسې پیسې پرې ځي.»
تر دې وړاندې په اسلاماباد کې د افغانانو شورا هم ویلي و، چې په دې وروستیو کې د ډېرو افغانانو ویزې ردېږي.
د پاکستان حکومت شاوخوا پنځه میاشتې وړاندې په پاکستان کې د مېشتو افغانانو د ویزو د تمدید لړۍ په بشپړه ډول ودروله، چې دې مسلې په پاکستان کې مېشت افغانان له بېلابېلو ستونزو سره مخ کړي دي.
په اسلاماباد کې مېشت افغانان وايي، پولیس په دومداره توګه په هغو ښارګوټو کې چې تر ډېره افغانان پهکې اوسېږي چاپې وهي او په بېلابېلو پلمو یې ځوروي.
دوی وايي، که څه هم د ویزو د تمدید لپاره یې ټولې قانوني لارې ازمایلې دي؛ خو بیا هم دغه ستونزه نهده حل شوې او پاکستاني پولیسو ته د افغانانو د ځور او کړاو ښه پلمه په لاس ورغلې ده. په افغانستان کې د طالبانو له بیا واکمنېدو وروسته د راپورونو پربنسټ؛ څه باندې نیم مېلیون افغانان په ویزو پاکستان ته تللي دي.
د پاکستاني طالبانو تحریک په ازاد کشمير کې پر لاریونوالو د پاکستان پوځ له خوا برید «ظالمانه» بللی او ویلي یې دي: «د پاکستان پوځ کشمیر ازاد یادوي خو هیڅکله یې خپلواکې نه ده ورکړې.» دوی له کشميري ولس څخه غوښتي، چې د پاکستان د واکمنو پر تشو ژمنو ونه غولیږي.
د پاکستاني طالبانو تحریک «ټي ټي پي»د پنجشنبه په ورځ په یوه خپره کړې خبرپاڼه کې ویلي: «ازاد کشمېر د طبیعي سرچینو، سیندونو او برېښنا له پروژو پاکستان ګټه اخلي خو ځايي خلکو ته هیڅ ګټه نه رسيږي.»
په خبرپاڼه کې ویل شوي، چې پاکستاني چارواکي د عامو کشمیریانو حقونه تر پښو لاندې کوي.
د پاکستاني طالبانو تحریک ویلي، چې د پاکستان واکمن د کشمیریانو د ستونزو د حل لپاره جدي هڅې نه کوي او یوازې یې د اسلام اباد د ګټو لپاره استفاده کوي.
دوی د کشمیر له خلکو غوښتي، چې «د پاکستان د واکمنو په وړاندې راويښ شي او د هغوی پر تشو ژمنو ونه غوليږي.»
دغه وسله والې ډلې د پاکستان له ټولو خلکو په ټينګار غوښتنه کړې، چې د کشمیریانو د حق غوښتلو ملاتړ وکړي او د لاریونوالو تر څنګ ودریږي.
د پاکستان تر ولکې لاندې کشمیر کې له تاوتریخوالي څخه په ډکو لاریونونو کې لږ تر لږه اته کسان وژل شوي.
د کشمیر د مدني حقونو د ډلو ایتلاف مشر ویلي چې مظاهرهچیان د سیمهییزو سیاستوالو، بیروکراټانو او نورو لوړپوړو چارواکو د امتیازاتو او ځانګړو مراعاتو پر ضد دي.
د اسلاماباد دوو امنیتي چارواکو رویټرز خبري اژانس ته ویلي چې تر اوسه درې پولیس او پنځه ملکي وګړي وژل شوي. د دوی په وینا، د مظاهرهچیانو او پولیسو ترمنځ نښتې د دوشنبې له ورځې راهیسې نه دي کمرنګه شوې.