د هند حکومت اعلان وکړ، چې د نوي ډیلي موټر چاودنه چې اته تنه یې وژلي او لږ تر لږه ۲۰ نور یې ټپیان کړي، ترهګریزه پېښه ګڼي. د هند ترهګرۍ ضد ملي ادارې (NIA) د پلټنو مسوولیت پر غاړه اخیستی، خو تر اوسه یې تبصره نه ده کړې.
د هند صدراعظم نریندرا مودي د خپلې کابینې له پرېکړې سره په ګډه ویلي،« هند د یو ظالمانه ترهګریز برید شاهد و. حکومت لارښوونه کوي چې پلټنه دې په بشپړ جديت او مسلکي توب پرمخ یوړل شي څو عاملان، همکاران او ملاتړي یې ژر تر ژره وپېژندل شي او محاکمه شي».
له چاودنې څو ساعته مخکې، د جمو او کشمیر پولیسو ویلي وو چې د یوې جلا ترهګریزې قضیې په تړاو یې اووه کسان نیولي دي، چې په هغو کې دوه ډاکټران هم شامل دي.
پولیسو په عملیاتو کې دوه تومانچې، دوه خپلکارې وسلې او نږدې ۲۹۰۰کیلوګرامه د چاودېدونکو توکو اجزا نیولي دي.
د کشمیر د پولیسو په وینا، پلټنې ښيي چې دغه کسان د یوې ترهګرې شبکې برخه دي چې له پاکستان او نورو هېوادونو د بهرنیو اړیکو په مټ فعال دي. پولیسو دا کسان د جیش محمد او انصار غزوة الهند ډلو پورې تړلي بللي دي.
د پاکستان د بهرنیو چارو وزارت لا د هند د ادعا په اړه غبرګون نه دی څرګند کړی.
هند له اوږدې مودې راهیسې پاکستان تورنوي چې د کشمیر په بډایه غرنیو سیمو کې د اسلامپالو وسلهوالو ملاتړ کوي، خو اسلاماباد دا تورونه ردوي.
په اپرېل میاشت کې، پر هندي سیلانیانو برید کې ۲۶ تنه ووژل شول، چې د هند حکومت یې تور پر «پاکستان ملاتړو ترهګرو» ولګاوه. دې پېښې د دواړو هېوادونو ترمنځ د تېرو څو لسیزو تر ټولو بد پوځي کړکېچ ته لاره هواره کړه، خو وروسته دواړو لوریو له څلور ورځنۍ جګړې وروسته اوربند وکړ.
رویټرز ته د درې بېلابېلو سرچینو په وینا، د هند پلټونکې ادارې د چاودېدلي موټر د چلوونکي او د کشمیر د نیول شویو کسانو ترمنځ احتمالي اړیکې څېړي. ویل کېږي یو له شکمنو کسانو ډاکټر و، چې ښایي له نیول شویو کسانو سره یې اړیکې لرلې.
د هند ترهګرۍ ضد ملي ادارې (NIA) د پلټنو مسولیت پر غاړه اخیستی، خو تر اوسه یې تبصره نه ده کړې.
له چاودنې وروسته، د کشمیر په بېلابېلو سیمو کې د عملیاتو په ترڅ کې شاوخوا ۵۰۰کسان لنډمهاله ونیول شول، خو ډېری یې له پوښتنو او ګرویږنو وروسته خوشې شول.
