دوو امریکایي سناتورانو جاش هاولي او ریچارډ بلومنتال له حکومت څخه غوښتنه کړې، چې د «مېټا» شرکت د درغلیزو اعلانونو څېړنه وکړي. دوی وایي، مېټا له جعلي، فریبورکوونکو او غېرقانوني اعلانونو ډېرې پیسې ګټي.
د رويټرز د راپور له مخې، د مېټا داخلي اسناد ښيي چې شرکت په ۲۰۲۴ کال کې تمه لرله، چې شاوخوا ۱۶ میلیارده ډالره د غېرقانوني اعلانونو له لارې ترلاسه کړي. د دوی د ادعا له مخې، دغه اندازه د شرکت نږدې ۱۰ سلنه کلنۍ عواید جوړوي. اسناد همدارنګه وایي، چې مېټا هرو شپږو میاشتو کې ۳.۵ میلیارده ډالر یوازې د درغلیزو اعلانونو له لارې لاس ته راوړي.
سناتوران وایي، چې تراوسه هم په فېسبوک او انسټاګرام کې د غېرقانوني قمار، مالي درغلۍ، جعلي کریپټو پروژو(بلاکچینونه) او ان د سیاستمدارانو د جعلي وېډیوګانو اعلانونه ښکاري. هغوی خبرداری ورکړی، چې ځینې اعلانونه د امریکا د حکومت یا سیاسي څېرو په نوم خپرېږي.
د سناتورانو د محاسبې له مخې، امکان شته چې مېټا د امریکا د خلکو د شاوخوا ۵۰ میلیارده ډالرو د درغلیزو زیانونو مسوول وي.
مېټا دا تورونه رد کړي او وایي، چې په تېرو ۱۸ میاشتو کې یې د درغلۍ د راپورونو شمېر ۵۸٪ راکم کړی او د سناتورانو خبرې یې «مبالغه» بللي دي.
