په کابل کې د اروپايي ټولنې شارژدافیرې ورونیکا بوسکوویچ پوهار د وزلوبې نندارې پرمهال ویلي، چې وزلوبه د افغانستان د بډایه کلتوري میراث ښکلی انځور وړاندې کوي. نوموړې د طالبانو د بهرنیو چارو وزیر سره یوځای د نندارې په ځای کې ده، خو په انځورونو کې ښکاري چې مرمۍ ضد واسکټ یې اغوستی.
ورونیکا بوسکوویچ پوهار، چې په دغو مراسمو کې د طالبانو د بهرنیو چارو له وزیر امیرخان متقي، د ترکیې، قطر او نورو هېوادونو له ډیپلوماټانو سره په یوه کتار کې لیدل کیږي، مرمۍ ضد واسکټ اغوستی دی.
طالبان وايي، چې افغانستان په دې وروستیو کې له امنیتي اړخه خوندي ځای دی، خو د پوهار مرمۍ ضد واسکټ ښيي چې ډيپلوماټان لا هم ځانونه خوندي نه انګیري.
ورونیکا بوسکوویچ پوهار د سې شنبې په ورځ پر خپل اېکس ولیکل، چې د وزلوبې د نندارې پر مهال یو ځل بیا د افغانستان د کلتوري میراث له عظمت څخه اغېزمنه شوې او دا یې د افغانانو د یوموټي توب نښه ګڼلې ده.
د افغانستان د وزلوبې اووم پړاو سیالۍ د کابل په یکه توت سیمه کې پیل شوې دي او ټاکل شوې یوه اونۍ نورې هم وغځیږي.
ورونیکا بوسکوویچ پوهار په دې وروستیو کې د طالبانو له مشرانو سره په مجلسونو او ناستو کې په لویدیزه جامه کې را څرګندیږي.
هغه شپو خولۍ پر سر کوي، ځانګړی لباس اغوندي، خو په ډېرو انځورونو کې په مرمۍ ضد واسکټ کې لیدل کیږي، چې د اروپايي ټولنې نښان پرې لګېدلی.
