د طالبانو اقتصاد وزارت د ملګرو ملتونو له ادارو سره د همغږۍ په ناسته کې د بشري مرستو د شفافیت، د انکشافي پروژو پر لور د تدریجي تګ او د ملي لومړیتوبونو له مخې د مرستو د تنظیم پر اړتیا ټینګار کړی، چې وايي، موخه یې د افغانستان د اقتصادي او معیشتي ستونزو کمول دي.
د طالبانو د اقتصاد وزارت مالي او اداري معین محمد عالم جمیل په مشرۍ د همغږۍ ناسته کې د ددې ډلې د ریاستالوزرا د اقتصادي معاونیت، د بهرنیو چارو وزارت، د اقتصاد وزارت مرکزي رییسانو او په افغانستان کې د ملګرو ملتونو د ادارو رییسانو او مسوولینو ګډون درلود.
په دې ناسته کې د اقتصادي او معیشتي ستونزو پر اغېزناکتوب، د بشري مرستو او انکشافي پروژو ترمنځ د همکارۍ پر پیاوړتیا او له بېړنیو مرستو څخه د دوامدارو انکشافي پروګرامونو پر لور د تګ په اړه بحث شوی.
د طالبانو اقتصاد وزارت وايي، ګډونوالو وویل چې مرستې باید د افغانستان له ملي لومړیتوبونو او د خلکو له اړتیاوو سره سمون ولري.
د طالبانو د اقتصاد وزارت مالي او اداري معین د ملګرو ملتونو له ادارو د پخوانیو همکاریو ستاینه کړې او د بشري او انکشافي مرستو د دوام غوښتنه یې تکرار کړې ده.
نوموړي د مرستو په بهیر کې د شفافیت پر پیاوړتیا، د سکتوري لومړیتوبونو له مخې د اغېزناکو پروژو پر پليتابه، انډولیز انکشاف او په زیانمنو او لرې پرتو سیمو کې د پروژو پر تمرکز ټینګار کړی دی.
د محلي کارکوونکو د ګومارنې له لارې د کاري فرصتونو رامنځته کول، د «کار په بدل کې خواړه» پروژو پراختیا، د کورنیو غیر دولتي موسسو د ظرفیت لوړول، د عملي لګښتونو کمول او د تدارکاتو په بهیر کې د کورنیو تولیداتو کارول د ناستې او بحث نور مهم ټکي ګڼل شوي دي.
د طالبانو د اقتصاد وزارت مالي او اداري معین محمد عالم جمیل ویلي، چې د نړیوالو مرستو همغږي د افغانستان د ملي لومړیتوبونو له مخې د میلیونونو افغانانو د ژوند شرایط ښه کولای او د عامه هوساینې لپاره بنسټیز بدلون راوستلای شي.
د یاد وزارت په وینا، په افغانستان کې د ملګرو ملتونو د ادارو رییسانو او مسوولانو د خپلو فعالیتونو د تشریح ترڅنګ د راتلونکي کال لپاره د ملاتړو او انکشافي پروګرامونو د دوام ډاډ ورکړی دی.
